Qazaqstanda 82 bosandyrý uıymy tekserilip, 81 sanıtarııalyq nusqama berildi
ASTANA. KAZINFORM - Densaýlyq saqtaý mınıstrligi bosandyrý uıymdarynyń 84 nysanynyń 82-sinde tekserý jumystaryn aıaqtady. Tekserý qorytyndysy boıynsha 81 sanıtarııalyq nusqama berilip, 29 medıtsınalyq uıymda dezınfektsııalyq-sterılızatsııalyq rejımniń buzylǵany anyqtaldy.
QR Densaýlyq saqtaý mınıstrligi baspassóz qyzmetiniń habarlaýynsha, tekserilgen nysandardyń qatarynda 35 perınataldyq ortalyq pen 47 bosandyrý bólimi bar.
Mamandar ınfektsııalyq qaýipsizdik talaptarynyń saqtalýyn, onyń ishinde sterılızatsııalaý jáne dezınfektsııalaý jumystaryn, jeldetý jáne sýmen jabdyqtaý júıeleriniń jaı-kúıin, ınfektsııalardy ýaqtyly anyqtaýdy jáne ınfektsııalyq baqylaý qyzmetteriniń jumysyn baǵalady.
Sondaı-aq zerthanalyq zertteýler júrgizildi. Bul qujattamany ǵana emes, medıtsınalyq kómek kórsetýdiń naqty jaǵdaılaryn da baǵalaýǵa múmkindik berdi.
Tekserý qorytyndysy boıynsha qaýipterdi shuǵyl joıýdy talap etetin faktiler boıynsha naqty sharalar qabyldandy.
Densaýlyq saqtaý birinshi vıtse-mınıstri Tımýr Sultanǵazıev óńirlerdiń densaýlyq saqtaý basqarmalaryna nusqamalardyń oryndalýyn aı saıyn baqylaýdy qamtamasyz etýdi jáne bosandyrý uıymdarynyń sanıtarııalyq-tehnıkalyq jaǵdaıyn belgilengen talaptarǵa sáıkestendirýdi tapsyrdy.
Sonymen qatar ınfektsııalyq baqylaý qyzmetteriniń kadrlyq qamtamasyz etilýin kúsheıtý, ınfektsııalardyń aldyn alý baǵdarlamalaryn ózektendirý jáne medıtsınalyq uıymdar basshylarynyń jeke jaýapkershiligin arttyrý tapsyryldy.
-Bizdiń mindetimiz – tek buzýshylyqty tirkep, nusqama berý emes. Bir aıdan keıin biz qaıta kelip, naqty nátıjeni kórýimiz kerek. Eger eskertý anyqtalsa, ol joıylýy tıis. Patsıenttiń qaýipsizdigi eseptermen emes, medıtsınalyq kómek kórsetýdiń naqty jaǵdaılarymen rastalýy kerek, – dep atap ótti Tımýr Sultanǵazıev.
Kelesi kezeńde balalar aýrýhanalarynda tekserý júrgiziledi. Odan keıin osyndaı jumys medıtsınalyq-sanıtarııalyq alǵashqy kómek uıymdarynda da júrgiziletin bolady.
Osyǵan deıin elimizdegi úzdik perzenthanalar men balalar aýrýhanalary anyqtalǵan bolatyn.
