Qazaqstanda 800-ge jýyq bala tegin ınsýlın pompalarymen qamtamasyz etilgen - Densaýlyq saqtaý mınıstrligi
ASTANA. QazAqparat - Qazaqstanda 780 bala tegin ınsýlın pompalarymen qamtamasyz etilgen, dep habarlaıdy QR Densaýlyq saqtaý mınıstrliginiń baspasóz qyzmeti.
2012 jyly Qazaqstanda jańa tehnologııa retinde 5-15 jas aralyǵyndaǵy balalardy emdeýdiń pompalyq ınsýlın terapııasy engizilgen bolatyn. Memlekettik bıýdjet qarjysy esebinen ınsýlın pompalary satyp alyndy.
«Qazaqstan - sýsamyrǵa shaldyqqan balalardy tegin emdeıtin álemdegi az memleketterdiń biri.
Qazrgi ýaqytta 780 bala ınsýlın pompalarymen tegin qamtamasyz etilgen. Bul óz kezeginde olardyń ómir súrý sapasyn jaqsartyp, múgedektikti azaıtýǵa múmkindik berdi», - delingen habarlamada.
Mınıstrliktiń málimetine qaraǵanda, ınsýlınmen qatar respýblıkalyq bıýdjetten balalarǵa ony qabyldaýǵa qajetti quraldar da satyp alynady.
2014 jyldan bastap, bul jobany keńeıtý jóninde sheshim qabyldandy jáne oǵan 1 jáne 18 jas aralyǵyndaǵy bala men jasóspirimderdi qamtý kózdelgen.
