Qazaqstanda 800 adam shoshqa tumaýyn juqtyrdy

ASTANA. QazAqparat - Qazaqstanda 800 adam shoshqa tumaýyn juqtyrdy. Bul jaıynda QazAqparat agenttiginiń resmı saýalyna jaýap bergen QR Ulttyq ekonomıka mınıstrligi janyndaǵy Tutynýshylar quqyǵyn qorǵaý komıteti tóraǵasynyń orynbasary - bas memlekettik sanıtarlyq dáriger Jandarbek Bekshın málim etti.

«Epıdemıologııalyq maýsym (2015 jyldyń 1 qazany) bastalǵan ýaqyttan beri joǵary tynys joldarynyń juqpaly derti (ORVI) 350 myńnan astam ret tirkeldi. Onyń ishinde 911-i zerthana arqyly tumaý ekendigi, al onyń 800-i nemese 87,3 paıyzy A(H1N1) shoshqa tumaýy ekendigi dáleldendi. Aýrýǵa shaldyqqandardyń basym bóligi 14 jastaǵy balalar jáne olar jalpy aýyrǵandardyń 70 paıyzyn quraıdy», - dedi J.Bekshın.

2010 jyldyń tamyzynda Dúnıejúzilik densaýlyq saqtaý uıymynyń bas dırektory A/H1N1 vırýsynyń 6-shi fazasynyń aıaqtalǵanyn jarııa etken bolatyn. Osy ýaqyttan beri bul tumaýdyń vırýsy A/H1N1-09 dep atalady jáne maýsymdyq tumaýdyń bir túrine jatqyzylǵan.