Qazaqstanda 80 myńǵa jýyq jas ınternet arqyly destrýktıvti qoǵamdastyqqa qosylǵan

ASTANA. QazAqparat – QR Ulttyq qaýipsizdik komıteti tóraǵasynyń orynbasary Rýslan Seısembaev lańkestik jáne ekstremıstik uıymdardyń áleýmettik jelilerdi óz múddesi úshin paıdalaný qaýpi týraly aıtty, dep habarlaıdy QazAqparat tilshisi.

«Halyqty radıkaldandyrýdyń taǵy bir mańyzdy faktory - terrorızmdi ınternet arqyly nasıhattaý. Internetti qoldanýshylardyń belsendiligi terrorızm men ekstremızm ıdeologteriniń úgit-nasıhat jumysyn júrgizýge jaǵdaı jasap otyr. Búginde bul - ásirese jastardy radıkaldandyrýdyń negizgi faktory. Tsıfrly ortada halyqaralyq terrorıstik uıymdar halyqqa destrýktıvti aqparattyq nasıhat júrgizip, psıhologııalyq áser etýi úshin paıdalanatyn jelilik ınfraqurylym quryldy», - dedi Rýslan Seısembaev elordada ótip jatqan ShYU keńesiniń 40-shy otyrysynda.

Onyń aıtýynsha, saraptamalyq baǵalaýlarǵa sáıkes, ınternette jumys isteıtin 10 myńǵa deıin ekstremıstik elektrondy alań bar.

«Áleýmettik jeliler men messendjerler arqyly derekter almasý, ekstremıstik materıaldardy taratý, sondaı-aq terrorıstik qyzmetti basqarý qurylady. Ókinishke qaraı, eń osal jáne terrorıstik qaýipke jıi ushyraıtyn sanat - jastar. Tek bıyl ǵana Qazaqstanda destrýktıvti qaýymdastyqtardaǵy jastar arasynan 80 myńǵa jýyq jeli paıdalanýshysy anyqtaldy. Olardyń ishinde 6 myńǵa jýyǵy 18 jasqa tolmaǵan. Bul máseleni sheshý úshin ShYU elderinde terrorızmge qarsy aqparattyq-nasıhattyq is-qımyl jumysyn odan ári jetildire túsý qajet», - dep tolyqtyrdy spıker.