Qazaqstanda 8 jylda teńiz floty 2,7 esege artty
ASTANA. 12 jeltoqsan. QazAqparat - Qazaqstanda 2005 jyldan bastap shaǵyn ólshemdi flot sany 70 %-ǵa ósip, 28,5 myń birlikti qurasa, teńiz flotynyń sany 2,7 esege artyp, 298 birlikti qurap otyr. Bul týraly QR KKM baspasóz qyzmetinen habarlandy.
QR KKM KBK Sý kóligindegi baqylaý basqarmasynyń jetekshisi Arlan Zakarıanovtyń aıtýynsha, flot sanyn arttyrý - sý kóligindegi qaýipsizdikti qamsyzdandyrý boıynsha sharalardy kúsheıtýdi talap etedi. Osylaısha, aǵymdaǵy jylda osy salada 1061 ákimshilik buzýshylyq anyqtalyp (2012 jyly - 722), kináliler ákimshilik jaýapkershilikke tartyldy.
«Jýyrda biz 2013 jyldyń navıgatsııa kezeńinde keme qatynasynda qaýipsizdikti qamtamasyz etý boıynsha keńes ótkizdik. Kólikti baqylaý komıtetiniń aýmaqtyq organdaryna muz tolyǵymen erigenge deıin kemelerdi paıdalanýǵa almaý úshin, ásirese kúz jáne kóktem aılarynda sý qoımasyn baqylaýdy kúsheıtýge tapsyrma berildi», - dep belgiledi Arlan Zakarıanov.
Qazirgi ýaqytta Qazaqstanda 298 teńiz, 819 ózen jáne 28583 shaǵyn ólshemdi kemeler tirkelgen. Shaǵyn ólshemdi sý kóligi kategorııasyna gıdrotsıkldar, motorly qaıyqtar, espeli qaıyqtar, baıdarkalar, úrlemeli qaıyqtar men katamarandar, sonymen qatar jelkendi kemeler jatady.
