Qazaqstanda 8 mln-nan astam medıtsınalyq anyqtama elektrondy túrde rásimdeldi
ASTANA. KAZINFORM — Qazaqstanda medıtsınalyq qujattardy tsıfrlandyrý qarqyn alyp keledi. Jyldyń basynan beri 8 mln-nan astam medıtsınalyq anyqtama men eńbekke ýaqytsha jaramsyzdyq paraǵy elektrondy formatta rásimdeldi. Bul týraly DSM málim etti.
Bıyl Qazaqstanda medıtsınalyq qujattar men kórsetiletin qyzmetterdi tsıfrlandyrý jumystary belsendi túrde jalǵasýda. Jyl basynan beri elektrondyq formatta 8 095 396 medıtsınalyq anyqtama men eńbekke ýaqytsha jaramsyzdyq paraǵy, sondaı-aq psıhıatrııa, narkologııa jáne ftızıatrııa baǵyttaryn qosa alǵanda, dıspanserlik esep boıynsha 5 698 396 anyqtama qalyptastyryldy.
— Elektrondyq medıtsınalyq qujattar medıtsınalyq tekserýden ótý, dárigerlik komıssııalardyń qorytyndylaryn alý, eńbekke ýaqytsha jaramsyzdyqty resimdeý, múgedektikti belgileý rásimderinen ótý, sanatorıılik-kýrorttyq em alý, balalarǵa arnalǵan medıtsınalyq qujattardy resimdeý, jumysqa ornalasý kezinde, sondaı-aq memlekettik organdar men basqa da aqparattyq júıelerge málimetter usyný barysynda paıdalanylady, — delingen habarlamada.
№ 073/e nysanyndaǵy elektrondyq anyqtamalar sanynyń aıtarlyqtaı óskeni de atap ótiledi. 2026 jylǵy maýsymda 36 994 anyqtama resimdelse, shildede olardyń sany 84 720-ǵa jetip, bir aı burynǵy kórsetkishpen salystyrǵanda 129%-ǵa artty. Tamyz aıynda resimdelgen anyqtamalardyń sany 147 522-ni qurap, shilde aıymen salystyrǵanda taǵy 74%-ǵa ósti.
№ 073/e nysanyndaǵy elektrondyq anyqtamalar sanynyń ósýine, sonyń ishinde Qazaqstan Respýblıkasy Іshki ister mınıstrliginiń tarapynan 65 jastaǵy jáne odan asqan adamdarǵa, sondaı-aq múgedektigi bar adamdarǵa qatysty baqylaýdyń kúsheıýi sebep boldy. Bul sanattaǵy azamattar medıtsınalyq tekserýden eki jylda bir ret ótýi tıis.
Medıtsınalyq qujattardy tsıfrlandyrý medıtsınalyq qyzmetterdiń qoljetimdiligin arttyrýǵa, medıtsına qyzmetkerlerine túsetin ákimshilik júktemeni azaıtýǵa jáne qaǵaz qujat aınalymyn qysqartýǵa yqpal etedi.
Sonymen qatar, elektrondyq format azamattardyń, medıtsınalyq uıymdardyń jáne memlekettik aqparattyq júıelerdiń arasyndaǵy ózara is-qımyldy barynsha jedel ári ashyq júrgizýge múmkindik beredi.
Aıta keteıik, endi elektrondyq jeke medıtsınalyq kitapsha barlyq adamǵa qoljetimdi.
