Qazaqstanda 8 qalanyń aýasy qatty lastanǵan, másele qalaı sheshiledi

ASTANA. QazAqparat – Ekologııalyq retteý jáne baqylaý komıteti tóraǵasynyń mindetin atqarýshy Aıdar Abdýalıev ortalyq kommýnıkatsııalar qyzmetinde ótken brıfıngide aýasy eń las 8 qalany atady, dep habarlaıdy QazAqparat tilshisi.

«Ekologııalyq monıtorıng qorytyndysy boıynsha 8 qalada aýanyń lastanýy joǵary deńgeıge jatqyzyldy. Olar – Astana, Almaty, Qaraǵandy, Temirtaý, Atyraý, Aqtóbe, Balqash jáne Óskemen», - dedi vedomstvo ókili.

Onyń aıtýyna qaraǵanda, aýanyń lastaný sebepterin úsh sanatqa bólýge bolady. Máselen, Almaty jáne Astana qalalarynda lastanýdyń negizgi kózi – jylý kózderi men avtokólikter, jeke sektor.

Óskemen jáne Temirtaý qalalarynda emıssııalardyń eń kóp kólemi ónerkásipke tıesili.

Aqtóbe jáne Atyraý qalalarynda eskirgen káriz-tazartý qurylystary joǵary lastanýǵa sebep bolyp otyr.

Óńirlerdiń ekologııalyq problemalaryn sheshýge baǵyttalǵan jol kartasy aıasynda 2025 jylǵa birqatar kórsetkishke qol jetkizilmek.

«Atap aıtqanda, 8 qalada atmosferanyń lastaný ındeksin joǵary deńgeıden ortasha deńgeıge deıin tómendetý; 7 jańa káriz-tazartý qurylǵysyn salyp, 12 eski káriz-tazartý qurylǵysyn jańartý; 24 jańa polıgon salyp, tolyp jatqan 5 polıgondy qalpyna keltirý jáne joıý», - dedi Aıdar Abdýalıev.