Qazaqstanda 8 deńgeıli ulttyq biliktilik júıesi engiziledi - T. Dúısenova

Eske salaıyq, otyrysta depýtattar «Qazaqstan Respýblıkasy men Halyqaralyq Qaıta Qurý jáne Damý banki arasyndaǵy qaryz týraly kelisimdi (Eńbek daǵdylaryn damytý jáne jumys oryndaryn yntalandyrý jónindegi joba) ratıfıkatsııalaý týraly» zań jobasyn maquldaǵan bolatyn.
«Kelisimge sáıkes, elimizde ulttyq biliktilik júıesin qalyptastyrý jáne engizý kózdeledi. Bul júıe álemniń barlyq damyǵan elderinde bar jáne ol damyǵan elderde segiz biliktilik deńgeıin qamtıdy. Onyń eń tómengi satysy orta mekteptik bilimi bar azamattar bolatyn bolsa, odan keıingi deńgeıde: orta, orta mamandandyrylǵan, bakalavrıat, joǵary, magıstratýra, PhD sanattary bolyp bólinedi. Osy biliktilik sanattaryna qarap azamattarǵa jumys oryndary atqarylatyn jumys kólemi men eńbekaqy deńgeıin belgileıdi», - dedi Tamara Dúısenova.
Mınıstrdiń sózine qaraǵanda, Qazaqstannyń qoldanystaǵy biliktilik júıesi tek úsh satydan turady, olar: orta, orta mamandandyrylǵan, joǵary biliktilik. «Al qazir azamattyq qyzmetshiler bakalavrıat, magıstratýra nemese PhD deńgeılerin ıelense, olardyń bul deńgeıine qaramastan birdeı kólemde jumys ta, eńbekaqy da belgilenip otyr», - deıdi mınıstr.
Onyń aıtýyna qaraǵanda, atalǵan kemshilikterdiń ornyn toltyrý maqsatynda Eńbek daǵdylaryn damytý jáne jumys oryndaryn yntalandyrý jónindegi joba boıynsha biliktilik deńgeıi qaıta qarastyrylyp, damyǵan memleketterdiń deńgeıine sáıkestendirý kózdeledi.
Eske sala keteıik, Halyqaralyq Qaıta Qurý jáne Damý banki Qazaqstanǵa Eńbek daǵdylaryn damytý jáne jumys oryndaryn yntalandyrý jónindegi jobany qarjylandyrýǵa 100 mln AQSh dollary somasynda qaryz beretin bolady.