Qazaqstanda 75 mekemeniń jumysshylar aldyndaǵy bereshegi 828 mln. teńgeni quraıdy - Eńbek mınıstri
ASTANA. QazAqparat - Elimizde 75 mekemeniń 6748 jumysshyǵa 828 mln. teńge bereshegi bar. Búgin Parlament Májilisinde Eńbek jáne halyqty áleýmettik qorǵaý mınıstri Tamara Dúısenova osylaı málim etti.
Eske sala keteıik, jalpy otyrysta palata depýtattary «Jalaqyny qorǵaý týraly konventsııany (95-konventsııa) ratıfıkatsııalaý týraly» zań jobasyn maquldaǵan bolatyn.
Konventsııany talqylaý barysynda depýtat Nurtaı Sabılıanov Qazaqstanda jalaqynyń turaqty túrde tólený máselesin qamtamasyz etýdi kóterdi. «Konventsııanyń 15-babynda «jalaqy turaqty túrde tólenedi» dep jazylǵan. Al bizdiń elimizde, kóp jaǵdaıda jalaqy ýaqtyly tólenbeı keledi», - dedi depýtat.
Óz kezeginde mınıstr Tamara Dúısenova ókinishke qaraı, elimizdegi jumys berýshilerdiń ýaqtyly eńbekaqyny tólemeý faktileri bar ekenin alǵa tartty. Osyǵan oraı, oblys ákimdikteri janynan atalmysh máselege qatysty arnaıy shtabtar qurylyp, jumys jasap keledi.
«2013 jyldyń basynda jalpy jumys berýshilerdiń eńbekaqy boıynsha bereshek qaryzy 1,1 mlrd. teńgeniń kóleminde bolǵan edi. Al aǵymdaǵy jylǵy 21 aqpandaǵy jaǵdaı boıynsha respýblıkamyzdaǵy 75 mekemeniń 6748 jumysshyǵa 828 mln. teńge bereshegi bar. Bular boıynsha Úkimet janynda úshjaqty komıssııa jumys jasap jatyr», - dedi Eńbek mınıstri.
