Qazaqstanda 74 temirjol vokzalyn qaıta jańǵyrtý aıaqtaldy
ASTANA. KAZINFORM – Qazaqstanda temirjol vokzaldaryn aýqymdy jańǵyrtý baǵdarlamasy aıasynda 74 nysanda qaıta jańǵyrtý jumystary aıaqtaldy.
Memleket basshysy Qasym-Jomart Toqaevtyń tapsyrmalaryn oryndaý aıasynda júzege asyrylyp jatqan baǵdarlama elimiz boıynsha 124 temirjol vokzalyn qamtıdy. Jobanyń negizgi maqsaty – jolaýshylarǵa kórsetiletin qyzmet sapasyn arttyrý, vokzaldardaǵy qolaılylyqty jaqsartý jáne nysandardy zamanaýı talaptarǵa sáıkestendirý.
– Jóndeý jumystary vokzal ınfraqurylymyn keshendi jańǵyrtýdy kózdeıdi: ǵımarattar men ınjenerlik jelilerdi jańartý, platformalar men vokzal mańyndaǵy aýmaqtardy rekonstrýktsııalaý, kútý zaldaryn keńeıtý, zamanaýı qaýipsizdik júıelerin, lıft pen kótergish qurylǵylardy ornatý, sondaı-aq kedergisiz orta qalyptastyrý, – delingen resmı aqparatta.
Tozý deńgeıi joǵary vokzaldarda eski ǵımarattar tolyqtaı buzylyp, olardyń ornyna jańa jolaýshylar keshenderi salynyp jatyr.
Búginde baǵdarlamaǵa engizilgen 124 temirjol vokzalynyń 74-inde qaıta jańǵyrtý jumystary aıaqtalǵan. Qalǵan nysandarda jańartý jumystary jalǵasýda.
Jobalar aıaqtalǵannan keıin vokzaldardaǵy jolaýshylarǵa arnalǵan jaǵdaı jaqsaryp, qaýipsizdik pen qoljetimdilik deńgeıi artady dep kútiledi.
Aıta keteıik, Astana-1 vokzalyn qaıta jańǵyrtý jumystary qalaı júrip jatqanyn mynaý siltemeden oqı alasyz.
