Qazaqstanda 729 adam áleýmettik tólemderden óz erkimen bas tartty
ASTANA. KAZINFORM — Eńbek mınıstrligi 2026 jylǵy qazanda iske qosylǵan «Áleýmettik tólemderden óz erkimen bas tartý» tsıfrlyq servısin osy ýaqytqa deıin 729 azamat paıdalanǵanyn habarlady.
— Osylaısha, 729 adam ózine taǵaıyndalǵan áleýmettik tólemderden erikti túrde bas tartý týraly sheshim qabyldaǵan. Bul — áleýmettik jaýapkershilik pen qoǵamdaǵy ózara yntymaqtastyq qaǵıdattarynyń kórinisi, ıaǵnı ózin jáne otbasyn óz betinshe qamtamasyz etýge múmkindigi bar azamattar memlekettik qoldaýdan sanaly túrde bas tartýdy jón kórgen, — delingen habarlamada.
Aıta keteıik, 2027 jylǵy 1 qańtardan bastap áleýmettik járdemaqylardyń 36 túriniń 12-si boıynsha memlekettik qoldaý kórsetý tetigi ataýlylyq qaǵıdatyna negizdeledi. Kómek birinshi kezekte oǵan shyn máninde muqtaj azamattarǵa baǵyttalady.
«Áleýmettik tólemderden óz erkimen bas tartý» tsıfrlyq servısi eGov Mobile mobıldi qosymshasynda qoljetimdi. Ol tek áleýmettik tólemder men járdemaqy alýshylarǵa memlekettik organdarǵa barmaı-aq, jekelegen áleýmettik qoldaý túrlerinen bas tartý týraly elektrondyq ótinishti óz betinshe berýge múmkindik beredi.
Áleýmettik tólemderden bas tartý — azamattyń mindeti emes, tek óz erkimen qabyldaıtyn sheshimi ekenin atap ótý kerek. Servıs, eń aldymen, materıaldyq jaǵdaıy joǵary jáne aýqatty sanatqa jatatyn, otbasyn óz betinshe qamtamasyz etýge múmkindigi bar azamattarǵa arnalǵan.
Ómirlik jaǵdaıy ózgergen jaǵdaıda azamattar tıisti memlekettik qoldaýdy qaıta taǵaıyndaý týraly ótinish berýge quqyly. Ótinish qoldanystaǵy zańnamaǵa sáıkes qaralady.
Eńbek jáne halyqty áleýmettik qorǵaý mınıstrligi servıstiń tek elektrondyq úkimettiń resmı platformalarynda — eGov Mobile mobıldi qosymshasy men eGov.kz portalynda qoljetimdi ekenin eske salady.
Osyǵan deıin Endi eGov arqyly áleýmettik tólemderden óz erkimen bas tartýǵa bolatynyn jazdyq.
