Qazaqstanda 70 jasóspirim kolonııada jazasyn ótep júr

ALMATY. KAZINFORM — Elde kámelet jasyna tolmaǵan 70 jasóspirim abaqtyda otyr. Bul týraly Іshki ister mınıstrliginiń Kazinform saýalyna joldaǵan jaýabynda aıtylǵan.

Vedomstvodan málim etkendeı, Іshki ister mınıstrligi múddeli memlekettik organdarmen jáne qoǵamdyq ınstıtýttarmen birlesip, Memleket basshysynyń tapsyrmasy boıynsha jańa biryńǵaı zań ázirlep jatyr. 

— Atalǵan zań jobasynda jasóspirimder arasyndaǵy quqyq buzýdyń aldyn alýǵa jaýapty sýbektilerdiń ózara is-qımylynyń jańa formaty jan-jaqty qarastyrylady, — dep atap ótti mınıstrlikten. 

Kámeletke tolmaǵandar arasynda praktıkalyq sharalar únemi júrgizilip otyrady. Ár óńirde balalarǵa qatysty zorlyq-zombylyq faktilerine den qoıý boıynsha vedomstvoaralyq mobıldi toptar qurylǵan.

Quqyq buzýdyń aldyn alýdy jáne bala quqyǵyn qorǵaýdy kúsheıtý maqsatynda búkil oqý oryndarynda kezdesýler uıymdastyrylady. 

— Máselen, mınıstrdiń tapsyrmasymen resbýlıka boıynsha 10 sáýir men 6 mamyr aralyǵynda «Jasóspirim» jedel-aldyn alý sharasy ótti. Oǵan 7,4 myńnan astam polıtsııa qyzmetkeri, bilim organdarynyń 1500 ókili jumyldyryldy. Dese de, kámelet jasyna tolmaǵandar arasynda qylmys toqtar emes. Qazir elimizde jasóspirimder jazasyn óteıtin bir qonys-kolonııa bar. Onda 70-ten astam jasóspirim jazasyn ótep jatyr. Kolonııaǵa negizinen 16 jastan bastap jóneltedi, — dep jazylǵan jaýapta.

Osyǵan deıin Almaty oblysynda oqýshy óz synyptasyn óltirip tastaǵanyn jazǵanbyz.