Qazaqstanda 70 paıyz naýqasta koronavırýs sımptomsyz ótken
«Naýqastardyń arasynda aýyrǵan, sımptommen kelgen adamdardyń sany 15-16 paıyz kóleminde. Al 70 paıyz naýqas sımptomsyz tirkelgen. Sebebi bul naýqastardy tabý úshin Densaýlyq saqtaý mınıstrligi jáne jergilikti ákimshilikter aldyn alý skrınıngin ótkizip jatyr. Prezıdenttiń tapsyrmasy boıynsha qazirgi kúni skrınıngtiń kólemin táýligine 25 myń testke arttyrdyq. Bastapqy kezde kúnine 3-4 myń ǵana bolǵan edi. Jalpy osy epıdemııa bastalǵannan beri elimizde 711 myń test ótkizildi. Olardyń 260 myńnan astamy, ıaǵnı 40 paıyzyn aldyn alý skrınıngi dep aıtýǵa bolady», - dedi mınıstr Ortalyq kommýnıkatsııalar qyzmetindegi brıfıng barysynda.
Mınıstr úlken ujymdarda, medıtsınalyq mekemelerde, áleýmettik uıymdarda skrınıng ótkizilip, biraz naýqastyń tabylǵanyn jáne olar oqshaýlandyrylǵanyn atap ótti.
«Bul - óte mańyzdy másele. Árıne, kóp jaǵdaıda azamattar: «Men aýyrmaımyn, eshqandaı sımptomy joq. Nege meni karantınge nemese aýrýhanaǵa jatqyzady?» dep surap jatyr. Onyń sebebi - osyndaı sımptomsyz aýrýlar basqa azamattarǵa ınfektsııany juqtyrýy múmkin. Ol belgili jaǵdaı. Dúnıejúzinde densaýlyq saqtaý uıymynyń keńesi boıynsha, basqa da ǵylymı zertteý jumystarynyń negizinde sımptomsyz azamattardy oqshaýlaýǵa jiberýimiz qajet. Buryn biz olardy aýrýhanaǵa jatqyzǵanbyz. Qazir múmkindik bolsa úılerinde nemese arnaıy karantındik statsıonarlarǵa jatqyzyp, basqa adamdardan bólekteýimiz qajet», - dedi ol.
Onyń atap ótýinshe, keıbir memlekette bul sımptomsyz naýqastardy esepke almaıdy. Jalpy statıstıkaǵa kirgizbeıdi.
«Biz bul durys emes dep oılaımyz. Qazaqstanda barlyq tirkelgen naýqastardy, juqtyrǵan naýqastardy esepke kirgizip, sanaımyz. Qazir naýqastardyń ósimin kórip otyrmyz. Onyń sebebi - aldyn alý. Juqtyrǵan azamattardy taýyp, oqshaýlaýǵa jibersek, bul indetti toqtatýǵa múmkindik bar», - dedi Eljan Birtanov.