Qazaqstanda 70 myńnan astam sábı proaktıv ádisimen tirkeldi
Onyń aıtýynsha, elimizde 1,5 jyl buryn iske qosylǵan proaktıv qyzmeti arqyly 70 myń balanyń týý týraly qujaty rásimdelip, bala týýǵa baılanysty beriletin 13 myń járdemaqy sms arqyly taǵaıyndaldy.
«Barlyǵyn jeńildetip, ońtaılandyrý, elektrondy formatqa kóshirý - tsıfrlandyrý prıntsıpiniń negizi osy. Biz búginde atalǵan prıntsıpti oryndap qana qoımaı, halyqtyń altyn ýaqytyn únemdeýin de oılastyryp, proaktıv qyzmetin engizdik. Qoldanysqa engen alǵashqy proaktıv qyzmeti bala týýmen baılanysty. Men bul istiń basy-qasynda júrgenimdi maqtan tutamyn. Birneshe jyldan keıin proaktıv ádisi arqyly balabaqsha kezegine turǵan 13 myń búldirshin bóbekjaıǵa barady», - dep jazdy óz paraqshasynda vıtse-mınıstr.
Bala týýyna baılanysty úsh memlekettik qyzmetti birden alýǵa múmkindik beretin proaktıv qyzmeti 2017 jyldyń 29 jeltoqsanynda QR Densaýlyq saqtaý, Eńbek jáne halyqty áleýmettik qorǵaý mınıstrlikteriniń jáne egov.kz portalynyń aqparattyq bazasynyń ıntegratsııalanýy nátıjesinde bastaý aldy. Proaktıv qyzmeti aıasynda jańa bosanǵan analarǵa quttyqtaý habarlamasy joldanyp, perzenthanadan shyqpaı-aq, balanyń týý týraly kýáligine tapsyrys, áleýmettik járdemaqynyń taǵaıyndalýyna ótinish berip, balabaqsha kezegine turý usynylady.
Osylaısha Qazaqstan TMD memleketteriniń arasynda alǵashqy bolyp proaktıv ádisimen memlekettik qyzmetter kórsetetin elge aınaldy. Vıtse-mınıstrdiń jazýynsha, búginde proaktıvti formatta múgedektik boıynsha áleýmettik járdemaqy taǵaıyndaý reti ońtaılandyrylyp jatyr.
