Qazaqstanda 70 myńnan astam otbasy turǵyn úı jaldaý aqysyna sýbsıdııa alady

NUR-SULTAN. QazAqparat – Turǵyn úı jaldaý aqysyn bıýdjet esebinen sýbsıdııalaý sharasy 10 jylda 500 myńnan astam qazaqstandyqtyń baspana máselesin sheshedi. QR Úkimet basshysy Álıhan Smaıylov Úkimet otyrysynda osyndaı málimet keltirdi, dep habarlaıdy QazAqparat tilshisi.

«Azamattardyń ál-aýqatyn jaqsartý memlekettik saıasattyń eń mańyzdy mindeti bolyp tabylady. Osy mindetke jetýdiń basym baǵyttarynyń biri – ol turǵyn úıdiń qoljetimdi bolýy. Jalpy qurylys salasy jyl saıyn oń dınamıka kórsetip, ósip keledi. Ótken jyldyń qorytyndysy boıynsha 17,1 mln sharshy metr úı salyndy. Turǵyn úı qurylysyna shamamen 2,4 trln teńge ınvestıtsııa tartyldy. Soǵan qaramastan, qarapaıym azamattardyń basym bóliginiń baspanaǵa qoly jetpeı júr», - dedi Úkimet basshysy.

Onyń sózine qaraǵanda, jyl saıyn úı kezegine turǵandardyń sany kóbeıip jatyr.

«Osyǵan oraı Memleket basshysynyń tapsyrmasy boıynsha turǵyn úı saıasatynyń jańa tásilderi ázirlendi.

Munda «Otbasy bankke» erekshe rol beriledi. Ol baspanaǵa muqtaj adamdardyń kezegin qalyptastyrý jáne olarǵa jeńildikti turǵyn úılerdi satý boıynsha biryńǵaı operator bolady», - degen Álıhan Smaıylov azamattarǵa úı satyp alý úshin zeınetaqy jınaqtarynyń bir bóligin «Otbasy bankindegi» depozıtterge salý múmkindigi berilgenin eske saldy.

«Zańnamany reformalaý aıasynda turǵyn úıdi kirisine qaraı satý, arendalyq tólemderdiń bir bóligin sýbsıdııalaý jáne aýyldy jerlerde turǵyn úı salý mehanızmderi engiziledi.

Sonymen qatar, Memleket basshysynyń tapsyrmasyna sáıkes, arendalyq tólemniń bir bóligin sýbsıdııalaý mehanızmin engizý týraly sheshim qabyldandy.

Shamamen baspanaǵa muqtaj 70 myńnan astam otbasy osy mehanızmmen qamtylady. Olar jaldaý aqysynan únemdelgen qarajatty úı satyp alýǵa jınaı alady.

Jalpy jańa tásilder 10 jyl ishinde turǵyn úı kezeginde turǵan jarty mıllıonnan astam adamnyń baspana máselesin sheshýge jáne memlekettik qoldaýdyń ádiletti, ashyq ári qoljetimdi júıesin jasaýǵa múmkindik beredi», - dedi Premer-Mınıstr.