Qazaqstanda 70 medıtsınalyq jáne 50 áleýmettik nysannyń qurylysy josparlanyp otyr
ASTANA. KAZINFORM — Quryltaıdyń Óńirlik jáne ınfraqurylymdyq damý komıtetiniń otyrysynda óńirlerdi damytý, kólik-logıstıka júıesin jetildirý jáne áleýmettik nysandar salý máseleleri talqylandy. 2029 jyldyń sońyna deıin ınfraqurylymdy jańǵyrtýǵa Ulttyq qordan shamamen 6,5 trln teńge bólý josparlanyp otyr. Bul týraly Quryltaıdyń baspasóz qyzmeti málim etti.
Quryltaıdyń Óńirlik jáne ınfraqurylymdyq damý komıtetiniń tóraǵasy Ámirbek Ospanbekovtiń tóraǵalyǵymen Memleket basshysynyń «Jańa tarıhı kezeńdegi Qazaqstannyń ózekti mindetteri» atty Joldaýynda belgilengen ınfraqurylymdy jańǵyrtý mindetterin iske asyrý máseleleri talqylandy. Jıynǵa Quryltaı Tóraǵasynyń orynbasary Nurlan Beknazarov, depýtattar jáne jaýapty mınıstrlikterdiń ókilderi qatysty.
Komıtet tóraǵasy Ámirbek Ospanbekov jıynnyń ashylýynda Prezıdent Joldaýynyń mańyzyna toqtaldy. Onyń aıtýynsha, Táýelsizdiktiń 35 jyldyǵy qarsańynda jarııalanǵan strategııalyq qujat el damýynyń negizgi baǵyttaryn aıqyndap, halyqtyń ál-aýqatyn arttyrýǵa arnalǵan naqty mindetterdi belgiledi.
— Prezıdent kelesi jyldy Jalpyhalyqtyq aýqymdy qurylys jyly dep jarııalaýdy usyndy. Bizdiń komıtet bul bastamany tolyq qoldaıdy. Joldaýda aıtylǵan óńirlerdi damytý jáne ınfraqurylymdy jańǵyrtý jumystaryna belsendi qatysamyz, — dedi Ámirbek Ospanbekov.
Quryltaı Tóraǵasynyń orynbasary Nurlan Beknazarov halyqtyń áleýmettik-ekonomıkalyq jaǵdaıyn jaqsartý baǵytyndaǵy mindetterge toqtalyp, áleýmettik nysandardy, kólik jáne ınjenerlik ınfraqurylymdy salý men jańǵyrtýdyń mańyzyn atap ótti.
— Memleket basshysy jańa avtomobıl jáne temirjoldar, óndiristik jáne energetıkalyq nysandar, kópirler salýdy tapsyrdy. Úkimet ınfraqurylymdy jańǵyrtýdyń aýqymdy josparyn ázirleýi kerek. 2029 jyldyń sońyna deıin bul maqsattarǵa Ulttyq qordan shamamen 6,5 trıllıon teńge bólý josparlanyp otyr. Qarajat qoǵamǵa barynsha paıda ákeletin jobalarǵa ǵana jumsalýy tıis. Árbir jobanyń ekonomıkalyq jáne áleýmettik tıimdiligi basty nazarda bolýy kerek. Prezıdent qurylys jumystarynyń barysy qatań baqylaýda bolatynyn da atap ótti, — dedi Nurlan Beknazarov.
Sonymen qatar árbir iri qalanyń Úkimetpen kelisilgen orta jáne uzaq merzimdi damý jospary ázirlenýge tıis. Memleket basshysy usynǵan «Halyqtyq qurylys» baǵdarlamasy elimizdegi iri ınfraqurylymdyq jobalardyń birine aınalmaq. Vıtse-spıkerdiń aıtýynsha, bul bastama júzdegen myń jańa jumys ornyn ashýǵa, halyqtyń tabysyn arttyrýǵa jáne óńirlerdiń ekonomıkalyq áleýetin kúsheıtýge múmkindik beredi.
Quryltaı depýtattary Erbol Danaǵulov, Begaly Eralıev, Zamır Saǵynov jáne Marat Shıbutov kólik ınfraqurylymyn damytý jónindegi usynystaryn ortaǵa saldy. Olar temirjoldar men avtomobıl joldaryn jańǵyrtý, kólik-logıstıka júıesiniń tıimdiligin arttyrý, júk tasymalynyń úzilissizdigin qamtamasyz etý jáne shekaradaǵy ótkizý ınfraqurylymyn jetildirý máselelerin kóterdi.
Depýtattardyń pikirinshe, bul baǵyttardaǵy jumystardy júıeli júrgizý Qazaqstannyń tranzıttik áleýetin arttyryp, óńirlerdiń ınvestıtsııalyq tartymdylyǵyn kúsheıtedi jáne otandyq bıznes úshin jańa múmkindikter ashady.
Joldaýdaǵy mindetterdi iske asyrý aıasynda atqarylyp jatqan jumystar men aldaǵy josparlar týraly Kólik vıtse-mınıstri Jánibek Taıjanov, Ónerkásip jáne qurylys vıtse-mınıstri Darhan Myrzabaev jáne Ulttyq ekonomıka vıtse-mınıstri Arman Qasenov baıandady.
Mınıstrlik ókilderiniń málimetinshe, óńirlerde shamamen 70 densaýlyq saqtaý nysanyn salý josparlanyp otyr. Olardyń qatarynda perzenthanalar, aýrýhanalar, jedel járdem stantsııalary, balalardy ońaltý ortalyqtary jáne erekshe qajettilikteri bar balalarǵa arnalǵan sport zaldary bar. Budan bólek, bilim berý, sport jáne mádenıet salalarynda shamamen 50 nysannyń qurylysy bastalady.
Sondaı-aq turǵyn úı-kommýnaldyq sharýashylyqty damytýǵa qomaqty qarajat bólinedi. Úkimetke jyl sońyna deıin naqty jobalardyń bastapqy tizimin ázirleý tapsyryldy.
Jıyn barysynda memlekettik organdardyń ókilderi depýtattardyń suraqtaryna jaýap berdi.
Otyrysty qorytyndylaǵan komıtet tóraǵasy Ámirbek Ospanbekov Joldaýda belgilengen mindetterdi iske asyrý úshin depýtattar men Úkimet birlesip jumys isteýi qajet ekenin aıtty.
— Kólik-logıstıka salasynda Kólik mınıstrliginiń qatysýymen kóshpeli jáne taqyryptyq otyrystar ótkizemiz. Sonymen qatar jol salasyn reformalaýǵa jáne avtomobıl joldarynyń sapasyn arttyrýǵa baǵyttalǵan zań jobasyn ázirleý úshin jumys toby quryldy, — dedi Ámirbek Ospanbekov.
eske sala keteıik, 28 qazan kúni Prezıdent Qasym-Jomart Toqaev Quryltaı otyrysynda «Jańa tarıhı kezeńdegi Qazaqstannyń ózekti mindetteri» atty Joldaýyn jarııalady.
