Qazaqstanda 70-ke jýyq jańa medıtsınalyq nysan salynady – mınıstr
ASTANA.KAZINFORM – Qazaqstannyń barlyq óńirinde 70-ke jýyq jańa densaýlyq saqtaý nysanyn salý josparlanyp otyr. Bul týraly Úkimet otyrysynda QR Densaýlyq saqtaý mınıstri Aqmaral Álnazarova málimdedi.
– Memleket basshysynyń tapsyrmasyn oryndaý aıasynda mınıstrlik óńirlerdegi medıtsınalyq-demografııalyq jaǵdaıdy jáne tıimdilik ólshemsharttaryn eskere otyryp, densaýlyq saqtaý nysandaryn salý qajettiligine taldaý júrgizýdi bastady, – dedi mınıstr.
Onyń aıtýynsha, josparǵa 1 700 tósekke arnalǵan segiz zamanaýı perınataldyq ortalyq kiredi. Olar Astana, Almaty, Shymkent, Qaraǵandy, Qaskeleń, Qyzylorda jáne Oral qalalarynda salynady.
Sonymen qatar Atyraý, Aqtóbe, Almaty, Shymkent, Qaskeleń, Semeı jáne Aqtaý qalalarynda jalpy 1 550 tósekke arnalǵan jeti kópbeıindi balalar aýrýhanasyn salý kózdelgen. Astanada 200 tósekke arnalǵan balalarǵa shuǵyl kómek kórsetý ortalyǵy men 350 tósekke arnalǵan balalar hırýrgııasy ortalyǵy boı kóteredi.
– Balalarǵa kórsetiletin medıtsınalyq kómekti keńeıtý jáne mamandandyrylǵan, joǵary tehnologııalyq medıtsınalyq kómektiń qoljetimdiligin arttyrý kózdelip otyr, – dedi Aqmaral Álnazarova.
Budan bólek, Almaty, Aqtaý, Atyraý, Qyzylorda jáne Semeı qalalarynda jalpy 750 tósekke arnalǵan Balalardy ońaltýdyń ulttyq ortalyǵynyń bes óńiraralyq fılıaly ashylady.
Sondaı-aq Óskemen, Abaı jáne Túrkistan oblystarynda árqaısysy 300 tósekke arnalǵan kópbeıindi aýrýhanalar, al Jambyl oblysynda 325 tósekke arnalǵan juqpaly aýrýlar aýrýhanasy men mamandandyrylǵan korpýstar salý josparlanǵan.
Mınıstrdiń málimetinshe, jańa nysandar qatarynda 25 ambýlatorııalyq-emhanalyq mekeme, aýdandyq aýrýhanalar, jedel medıtsınalyq járdem nysandary, qan ortalyqtary jáne basqa da mamandandyrylǵan mekemeler bar.
– Nátıjesinde shamamen 1,8 mln sharshy metr medıtsınalyq ınfraqurylymdy qurý jáne jańartý, statsıonarlardaǵy tósek sanyn 9,2 myńǵa ulǵaıtý jáne jańǵyrtý, sondaı-aq ambýlatorııalyq kómek qýatyn aýysymyna 5,3 myńnan astam kelýshige kóbeıtý josparlanyp otyr, – dep atap ótti vedomstvo basshysy.
Aıta keteıik, Oljas Bektenov Prezıdent jarııalaǵan «Halyqtyq qurylys» jumyspen qamtýdyń ósýine jáne azamattardyń ál-aýqatynyń artýyna serpin beredi degen edi.
