Qazaqstanda 7 jylda analar ólimi 3 esege tómendedi - G. Ábdihalyqova

ASTANA. QazAqparat - 2007 jyldan beri Qazaqstanda analar ólimi 3 esege, al 2008 jyldan beri nárestelerdiń ólim-jitimi 1,5 esege azaıdy. Bul týraly búgin VII Astana ekonomıkalyq forýmy aıasynda ótken «G-Global: Jańa ekonomıkadaǵy áıelderdiń róli» atty halyqaralyq áıelder konferentsııasynda QR Úkimet basshysynyń orynbasary Gúlshara Ábdihalyqova málim etti.

«Otbasynyń densaýlyǵyn saqtaý - birinshi kezekte analar men balalardyń saýlyǵy. Otandyq densaýlyq saqtaý júıesiniń basymdyǵy da osyǵan baǵyttalǵan. Biz sońǵy jyldary ana men balanyń ólim-jitimin kemitý boıynsha birshama úlken jetistikterge jettik. 2007 jyldan beri Qazaqstanda analar ólimi 3 esege, al 2008 jyldan beri nárestelerdiń ólim-jitimi 1,5 esege azaıdy», - dep atap ótti G.Ábdihalyqova.

Degenmen, Premer-Mınıstrdiń orynbasary habarlaǵanyndaı, bul kórsetkishti odan ári tómendetýge qyrýar jumystar atqarylýy tıis. Osy maqsatta Qazaqstanda ana men balanyń densaýlyǵyn tekserýdi júıeli baǵytqa qoıý, sondaı-aq dertti aldyn alý sharalary júrgiziledi.