Qazaqstanda 7 jylda 3,6 mln jumys orny ashyldy: qaı óńirler kósh bastady

Jeti jylda 2,4 mln turaqty jumys orny ashyldy

Sońǵy jeti jylda qurylǵan 3,6 mln-nan astam jumys ornynyń 2,4 mıllıony turaqty jumys oryndaryna jatady. Al 2025 jyly 564,2 myń jańa jumys orny quryldy. Onyń ishinde 361,9 myńy nemese 64%-y turaqty, 202,3 myńy nemese 36%-y ýaqytsha jumys oryndary boldy.

Jańa jumys oryndaryn qurý halyqty jumyspen qamtyp qana qoımaı, qosymsha tabys kózderin qalyptastyrýǵa, salyq bazasyn keńeıtýge jáne ishki tutyný suranysyn arttyrýǵa yqpal etedi. Qazirgi ýaqytta jaldamaly jumystan túsetin tabys halyqtyń aqshalaı kirisiniń negizgi bóligin quraıdy. Onyń úlesi jalpy tabystyń shamamen úshten ekisine teń.

Osyǵan baılanysty turaqty ári ónimdi jumys oryndaryn qurý mańyzdy. Mundaı jumys oryndary azamattardyń turaqty tabys alýyna, kásibı daǵdylaryn jetildirýine jáne eńbek ónimdiligin arttyrýyna múmkindik beredi.

Qazaqstan Respýblıkasy Prezıdentiniń «Ádiletti Qazaqstan: bárimiz jáne árqaısymyz úshin. Qazir jáne árdaıym» saılaýaldy tuǵyrnamasy aıasynda 2030 jylǵa deıin 3,3 mln adamdy, sonyń ishinde 2026 jyly 480 myń adamdy jumyspen qamtý josparlanǵan.

Qaı óńirlerde turaqty jumys oryndary kóp ashyldy?

2025 jyly qurylǵan jańa jumys oryndarynyń ishindegi turaqty jumys oryndarynyń úlesi boıynsha Aqmola jáne Qostanaı oblystary kósh bastady. Eki óńirde de bul kórsetkish 76%-dy qurady.

Óńirlerdegi kórsetkishter tómendegideı:

• Aqmola oblysy – 17,2 myń turaqty jumys orny, úlesi 76%;

• Qostanaı oblysy – 24,5 myń, úlesi 76%;

• Jambyl oblysy – 38 myń, úlesi 72%;

• Aqtóbe oblysy – 38,5 myń, úlesi 71%;

• Shymkent qalasy – 22,5 myń, úlesi 71%.

Turaqty jumys oryndarynyń úlesi joǵary bolýy halyq tabysynyń uzaq merzimdi ósýine negiz qalaıdy. Sonymen qatar, óńirlerde jumyspen qamtý múmkindikteriniń artýy turǵyndardyń óz eldi mekeninde jumys isteýine jaǵdaı jasap, eńbek kóshi-qonynyń qajettiligin azaıtýǵa yqpal etedi. Jańa jumys oryndary jergilikti kásipkerlik pen qyzmet kórsetý salasynyń damýyna da serpin beredi.

Jumys oryndary qaı salalarda kóp quryldy?

2025 jyly jumys oryndarynyń basym bóligi basqa ekonomıkalyq qyzmet túrlerinde, bilim berý jáne aýyl sharýashylyǵy salalarynda ashyldy.

Jańa jumys oryndarynyń salalar boıynsha bólinisi:

• basqa ekonomıkalyq qyzmet túrleri – 137,7 myń oryn (38%);

• bilim berý – 80,5 myń (22,3%);

• aýyl, orman jáne balyq sharýashylyǵy – 60,4 myń (16,7%);

• qurylys – 27,6 myń (7,6%);

• densaýlyq saqtaý jáne áleýmettik qyzmet kórsetý – 25,2 myń (7%);

• kóterme jáne bólshek saýda, avtomobılder men mototsıklderdi jóndeý – 16,3 myń (4,5%);

• kólik jáne qoımalaý – 10,9 myń (3%);

• ónerkásip – 3,2 myń (0,9%).

Bul kórsetkishter jumys oryndarynyń ekonomıkanyń túrli sektorlarynda qalyptasyp jatqanyn kórsetedi. Bilim berý, densaýlyq saqtaý jáne basqa da qyzmet kórsetý salalaryndaǵy jumys oryndary áleýmettik qyzmetterdiń qoljetimdiligin qamtamasyz etse, qurylys, ónerkásip, aýyl sharýashylyǵy men kólik salalary ekonomıkalyq belsendiliktiń artýyna yqpal etedi.

Ásirese qosymsha qun qalyptastyratyn óndiristik salalardaǵy jumys oryndarynyń kóbeıýi mańyzdy. Mysaly, qurylys salasynyń damýy qurylys materıaldaryna, kólik-logıstıka qyzmetterine jáne merdiger uıymdardyń jumysyna suranysty arttyrady. Al ónerkásip pen aýyl sharýashylyǵy óńdeý, saýda jáne servıs salalarynda qosymsha jumys oryndarynyń paıda bolýyna múmkindik beredi.

Jumyspen qamtý ekonomıkalyq ósimge qalaı áser etedi?

Jańa jumys oryndaryn qurý ekonomıkalyq ósimniń nátıjesin halyqtyń tabysyna jetkizýdiń mańyzdy tetikteriniń biri sanalady.

Jumyspen qamtýdyń artýy birneshe baǵytta oń áser etedi. Atap aıtqanda, halyqtyń eńbek tabysy ósedi, ishki tutyný suranysy keńeıedi, bıýdjet pen áleýmettik qorlarǵa túsetin túsimder artady. Sonymen qatar jumyssyzdyqty jáne áleýmettik tólemderge táýeldilikti azaıtýǵa, óńirlerdiń ekonomıkalyq belsendiligin arttyrýǵa múmkindik beredi.

Jańa óndirister men jobalardyń iske qosylýy shaǵyn jáne orta bıznestiń damýyna da yqpal etedi. Óıtkeni kásiporyndar aınalasynda taýarlar men qyzmetterge suranys qalyptasyp, ilespe salalarda qosymsha jumys oryndary paıda bolady.

Sonymen birge jumyspen qamtý saıasatynyń nátıjesin tek qurylǵan jumys oryndarynyń sanymen baǵalaý jetkiliksiz. Olardyń sapasy da mańyzdy. Turaqty jumyspen qamtý, jalaqy deńgeıi, eńbek ónimdiligi jáne kásibı ósý múmkindikteri halyqtyń tabysyn uzaq merzimde arttyrýǵa negiz bolady.

Jumyspen qamtý kórsetkishi ósip keledi

Resmı statıstıkaǵa sáıkes, 2026 jyldyń ekinshi toqsanynda Qazaqstan ekonomıkasynda jumyspen qamtylǵan halyq sany 9,4 mln adamǵa jetti. Bul ótken jyldyń sáıkes kezeńimen salystyrǵanda 79,2 myń adamǵa kóp. Ósim negizinen jaldamaly jumysshylar sanynyń artýy esebinen qalyptasty.

Aldaǵy ýaqytta jumyspen qamtý saıasatyn turaqty jumys oryndaryn qurýǵa, eńbek ónimdiligin arttyrýǵa jáne joǵary jalaqy tólenetin jumys oryndarynyń sanyn kóbeıtýge baǵyttaý mańyzdy. Ásirese óńdeý ónerkásibi, qurylys, aýyl sharýashylyǵy jáne kólik salalarynda jańa múmkindikterdi damytý halyqtyń tabysyn arttyrýǵa ári ekonomıkalyq belsendilikti keńeıtýge yqpal ete alady.

Buǵan deıin elimizdegi jumys berýshiler kóbine qandaı mamandardy izdeıtinin jazǵan edik.