Qazaqstanda 7 mln gektarǵa jýyq jaıylymdyq jer paıdalanylmaı jatyr

NUR-SULTAN. QazAqparat - 2019-2021 jyldary júrgizilgen jumystardyń nátıjesinde 8,1 mln gektar paıdalanylmaıtyn nemese maqsatsyz paıdalanylatyn aýyl sharýashylyǵy jeri anyqtaldy dep habarlaıdy QazAqparat tilshisi.

Aýyl sharýashylyǵy mınıstrliginiń habarlaýynsha, anyqtalǵan bos jerdiń 6,8 mln gektary jaıylymdyq aımaqqa jatady.

«Eger 2021 jyldy alatyn bolsaq, onda 1,3 mln gektar paıdalanylmaıtyn jaıylymdar men egistik jer belgili boldy. Osyǵan baılanysty, vedomstvo bıyl osy baǵyttaǵy jumystyń qarqynyn arttyrýdy jáne aǵymdaǵy jyldyń sońyna deıin taǵy 5 mln gektar paıdalanylmaıtyn aýyl sharýashylyǵy maqsatyndaǵy jerdi memleket menshigine ótkizýdi josparlap otyr», - dep túsindiredi mınıstrlik habarlamasynda.

Bul ótken jyldyń osyndaı kóleminen 3 esege artyq.