Qazaqstanda 7 aıda 58,1 mln tonna kómir óndirildi

ASTANA. KAZINFORM – Bıyl 7 aıda 58,1 mln tonna kómir óndirildi. Bul týraly Ónerkásip jáne qurylym mınıstrliginiń Ónerkásip komıteti tóraǵasynyń orynbasary Turar Jolmaǵambetov aıtty.

«Bogatyr kómir», «Shubarkól kómir», elimizdiń shyǵysyndaǵy «Qarajyra» jáne Pavlodar oblysyndaǵy «Maıkóben-Vest» kásiporyndar kóp kólemde kómir óndiredi. Jedel derekterge sáıkes, joǵaryda atalǵan jáne ózge de kenishterde 7 aıdyń ishinde 58,1 mln tonna kómir óndirildi. Onyń ishinde energetıkaǵa 32,3 mln tonna, al kommýnaldyq-turmystyq sektorǵa shamamen 2,5 mln tonna kómir jetkizildi. Eksport 15,8 mln tonna kómir kóleminde qaldy»,- dedi ol Ortalyq kommýnıkatsııalar qyzmetindegi brıfıngte. 

Onyń atap ótýinshe, halyqty kómirmen der ýaqytynda qamtamasyz etý úshin jol kartasy ázirlenip, jergilikti ákimdikterge jiberilgen. 

«2024/2025 jylytý maýsymyndaǵy óńirlerdiń qajettilik jospary daıyndaldy. Kómir satyp alý protsedýrasyn tolyǵymen aıaqtadyq. Bıýdjettik uıymdar men halyqqa daıyndaý jumystaryn júrgizip jatyrmyz. Qazaqstan temir joly halyqqa jáne kommýnaldyq-turmystyqsektorǵa kómir jetkizý úshin jyljymaly qurammen qamtamasyz etedi. Atalǵan josparǵa sáıkes, bıylǵy jylytý maýsymyna kómir qajettiligi shamamen 8,6 mln tonnany quraıdy. Onyń 2,3 mln tonnasy – kommýnaldyq-turmystyq sektorǵa, 6,3 mln tonnasy halyqqa. 21 tamyzdaǵy QTJ derekterine sáıkes, qazirdiń ózinde 1 mln tonna jetkizildi. Óńirler sheginde kómirmen qamtamasyz etýli kórsetkishi jyldyq jospardyń 13 paıyzyn quraıdy», - dedi Turar Jolmaǵambetov.