Qazaqstanda 7 áýejaıdyń jaramdylyq sertıfıkatynyń merzimi ótip ketken
Keńestiń jumys toby azamattyq avıatsııanyń ushý qaýipsizdigin baqylaý jáne qadaǵalaý jónindegi qyzmettiń tıimdiligin zerttep, kóńil kónshitpeıtin qorytyndyǵa keldi.
2022 jyly qazan-jeltoqsan aılarynda Aqtóbe, Zaısan, Balqash, Shymkent, Pavlodar qalalaryndaǵy áýejaılarda áýe aılaqtarǵa beriletin jaramdylyq sertıfıkatynyń qoldanylý merzimi aıaqtaldy.
Al Atyraý jáne Qostanaı áýejaılarynda bıyl aqpanda aıaqtaldy.
Partııalyqtar ishki áýe tasymalyndaǵy qazirgi baǵa deńgeıin talqylady.
Keńes tóraǵasy, Májilis depýtaty Erlan Saırov bılettiń qymbatshylyǵyna shaǵymdanatyn azamattar sany kún sanap artyp bara jatqanyn atap ótti.
«Adamdar Air Astana jáne FlyArystan-nyń baǵa saıasatyna táýeldi. Tutynýshyǵa qamqorlyq jasalmaıdy. FlyArystan-nyń bılet qunyna qarap, bul kompanııany loýkoster dep aıtýǵa aýyz barmaıdy. Otandastarymyz Astanadan Parıjge ushyp barýǵa jetetin qarajat jumsaýǵa májbúr. Oraldan Almatyǵa deıingi bılet quny 80 myń teńgege deıin sharyqtaıdy. Al shetelde ushaqqa otyrsańyz, dál osy soma álemniń jartysyn aınalyp ótýge jetedi. Mine, elimizde áýe tasymalynyń qanshalyqty qymbat ekenin osydan-aq ańǵarýǵa bolady. Bul qarajat qaıda ketip jatyr? Air Astana kommertsııalyq kompanııa retinde jumys isteıdi. Biraq, qazirgi qyzmeti ulttyq tasymaldaýshy mártebesine sáıkes kelmeıdi», – dedi E.Saırov.
Bul pikirmen keńes múshesi, Májilis depýtaty Abzal Quspan da kelisip otyr. Sondaı-aq ol otandyq áýe kompanııalaryna teń jaǵdaı jasalmaǵan dep esepteıdi.
«Depýtat retinde ǵana emes, tutynýshy retinde de pikir bildirgim kelip otyr. Salada sybaılas jemqorlyq táýekelderi bar. Sebebi tek bir kompanııa – Air Astana úshin ǵana barlyq jaǵdaı jasalǵan. Máselen, Scat-tyń reısin nege birneshe saǵat kútemiz osy? Bul jaǵdaı adamdardyń ashý-yzasyn týǵyzady. Al Scat qyzmetkerleri bolsa, barlyq jaǵdaı tek Air Astana úshin ǵana jasalyp jatqanyn aıtady. Elimizde arzan baǵamen tasymaldaýshylar paıda bolýy úshin áýe keńistigimiz básekege qabiletti bolýy kerek», – dedi ol.
Buǵan jaýap retinde QR Indýstrııa jáne ınfraqurylymdyq damý vıtse-mınıstri Almaz Ydyrysov IIDM tarapynan eshqandaı kompanııaǵa memlekettik qoldaý men qorǵaý jasalmaıtynyn atap ótti.
Mınıstrlik tek ushý qaýipsizdigin qamtamasyz etedi.
«Air Astana – «Samuryq-Qazyna» qoryna qarasty kompanııa. Tıisinshe, strategııalyq mindetterge de solar jaýap berýi tıis. Al baǵa máselesine keletin bolsaq, ony QR Básekelestikti qorǵaý jáne damytý agenttigi belgileıdi. Halyqaralyq tájirıbege sáıkes, avıabılet qunyn belgileý máselesi zańnamalyq turǵyda rettelmeıdi. Ony avıakompanııalar naryq shartyna saı aıqyndaıdy», – dedi vıtse-mınıstr.
Keńes múshesi, Májilis depýtaty Marat Báshimov Air Astana kompanııasynyń qyzmetin zań buzý turǵysynan zerdelep, kompanııa men memlekettik organdar arasynda jasalǵan sharttardy tekserý qajet ekenin atap ótti.
«Ushaq Almaty áýejaıyna qonǵan soń shamamen bir jarym saǵat kútemiz. Birde avtobýs, endi birde trap tabylmaı qalady. Onyń bári qaıda ketken ózi? Joq bolsa satyp alýǵa bolmaı ma? Almatydan Astanaǵa bir kún buryn bılet satyp alǵysy kelgen adam jaǵa ustatarlyq jaǵdaıǵa tap bolady. Máselen, FlyArystan-nyń bılet quny – 60 myń teńge. Al Air Astana-ǵa múldem bılet satyp ala almaısyz. Elimizde ushaq jetispeıtin bolsa, ózge avıakompanııalardyń da jumys isteýine ruqsat eteıik. Mysaly, Wizz Air kompanııasy Qazaqstanda qyzmet kórsetýge daıyn otyr. Birde Los Anjeles-Nıý Iork baǵytyndaǵy ushaq bıletin 32 dollarǵa (15 myń teńge) satyp aldym. Ondaǵy araqashyqtyq shamamen 4000 shaqyrymdy quraıdy. Bıletti dál ushatyn kúni aldym. Al bizde mundaı baǵa bar ma?», – dedi saıasattanýshy Talǵat Qalıev.
