Qazaqstanda 6,9 mıllıonnan astam balanyń quqyǵyn qorǵaýǵa 1,3 trln teńge bólindi
ASTANA. KAZINFORM – Qazaqstanda Halyqaralyq balalardy qorǵaý kúni qarsańynda balalardyń quqyqtaryn qorǵaý jáne olardy qoldaý baǵytynda júzege asyrylyp jatqan memlekettik sharalar týraly málimet jarııalandy.
Úkimettiń dereginshe, búginde elimizde 6,9 mıllıonnan astam bala turady. Balalardyń quqyqtaryn qorǵaý memleket júrgizip otyrǵan áleýmettik saıasattyń negizgi basymdyqtarynyń biri bolyp qala beredi.
Bul baǵyttaǵy jumys Konstıtýtsııada bekitilgen balalarǵa qamqorlyq jasaý jáne olardy tárbıeleý qaǵıdatyna negizdelgen.
– Memlekettiń basty mindeti – otbasylar úshin balalardyń deni saý bolyp ósýine, sapaly bilim alýyna jáne ózderin qaýipsiz sezinýine múmkindik beretin qolaıly jaǵdaı qalyptastyrý, – delingen habarlamada.
Prezıdent Qasym-Jomart Toqaevtiń Ulttyq quryltaı qorytyndysy boıynsha bergen tapsyrmasyna sáıkes Úkimet 2026–2030 jyldarǵa arnalǵan «Qazaqstan balalary» tujyrymdamasyn bekitti.
Qujat balalardyń ál-aýqatyn arttyrýǵa baǵyttalǵan 158 is-sharany qamtıdy.
– Tujyrymdamany iske asyrýǵa jalpy kólemi 1,3 trln teńge qarastyrylǵan, – dep atap ótti Úkimetten.
Baǵdarlama aıasyndaǵy jumystar bilim berý, densaýlyq saqtaý, áleýmettik qorǵaý jáne qaýipsizdik baǵyttary boıynsha júzege asyrylady.
Tujyrymdama balalardyń quqyqtaryn qorǵaý júıesin jetildirýge, olardyń sapaly bilim men medıtsınalyq kómekke qoljetimdiligin arttyrýǵa, sondaı-aq qaýipsiz orta qalyptastyrýǵa baǵyttalǵan.
Aıta keteıik, Prezıdent aýyzbirshiligi myqty, tatý-tátti otbasy – baqytty balalyq shaqtyń arqaýy ekenin aıtty.
