Qazaqstanda 671 kásiporyn sýdy qaıta paıdalanýǵa kóshedi
ASTANA. KAZINFORM — Qazaqstandaǵy 671 ónerkásip kásiporny sýdy qaıta nemese aınalymdy paıdalaný júıesine kezeń-kezeńimen kóshedi. Jańa talap óndiristegi sý shyǵynyn azaıtýǵa baǵyttalǵan. Bul týraly Sý resýrstary jáne ırrıgatsııa mınıstrligi málim etti.
Qazaqstannyń ónerkásip kásiporyndary men jylý óndirýshi sýbektileri Sý kodeksine sáıkes qaıta nemese aınalymdy sýmen jabdyqtaýǵa kezeń-kezeńimen kóshý boıynsha bes jyldyq jospar ázirleýi tıis. Sondaı-aq qoldanystaǵy júıelerdi eń ozyq qoljetimdi tehnologııalardy qoldana otyryp jańǵyrtýy qajet.
Bul shara sýdyń óndiristik emes shyǵynyn azaıtýǵa baǵyttalǵan. Bul talaptar oryndalmaǵan jaǵdaıda ruqsat etilgen sý paıdalaný kólemin qysqartý sharalary qarastyrylǵan.
Aıta keteıik, Qazaqstanda jyl saıyn shamamen 25 mlrd tekshe metr sý tutynylady. Onyń 20-25 paıyzy ónerkásip qajetine jumsalady. Qazirgi ýaqytta 671 ónerkásip kásiporny qaıta nemese aınalymdy sýmen jabdyqtaýǵa kóshýge daıyndalyp jatyr. Búginde 191 kóshý jospary ázirlengen, onyń 91-i kelisý kezeńinde. Taǵy 278 jospar ázirlenip jatyr.
— Kelesi jyldan bastap bul qujattar arnaıy sý paıdalanýǵa ruqsat alý kezinde mindetti talapqa aınalady. Bul shara Sý resýrstaryn basqarý júıesin damytýdyń tujyrymdamasynda belgilengen nysanaly kórsetkishterge sáıkes ónerkásipte sýdy qaıta paıdalaný úlesin 28 paıyzǵa deıin arttyrýǵa baǵyttalǵan. Qazirgi ýaqytta mınıstrligimiz óndiristik maqsatta sý alatyn sý paıdalanýshylardyń tizimin anyqtady. Sonymen qatar ár kásiporyn boıynsha sońǵy úsh jyldaǵy statıstıkalyq derekter qaıta tekserilip jatyr. Sebebi sýdy qaıta paıdalaný faktileri keı jaǵdaıda qate túrde aınalymdy sýmen jabdyqtaý retinde kórsetilgen,— dedi Sý resýrstary jáne ırrıgatsııa vıtse-mınıstri Talǵat Momyshev.
Sý kodeksine sáıkes, Qazaqstandaǵy ónerkásiptik kásiporyndar men jylý óndirýshi sýbektiler qaıta nemese aınalymdy sýmen jabdyqtaý júıesine kezeń-kezeńimen kóshý boıynsha bes jyldyq josparlar ázirleýge tıis. Bul talaptar oryndalmaǵan jaǵdaıda, ruqsat etilgen sý paıdalaný kólemderin qysqartý sharalary kózdelgen.
Qaıta nemese aınalymdy sýmen jabdyqtaý júıesine kóshýge 671 ónerkásiptik kásiporyn daıyndalyp jatyr. Qazirgi ýaqytta 191 kóshý jospary ázirlendi, onyń ishinde 91 jospar kelisý satysynda. Taǵy 278 jospar ázirlenip jatyr.
Sý resýrstaryn basqarý júıesin damytý tujyrymdamasyna sáıkes, ónerkásipte qaıta paıdalanylatyn sýdyń úlesin 28%-ǵa deıin arttyrý kózdelgen.
Qazaqstanda jyl saıynǵy sý tutyný kólemi shamamen 25 mlrd m³. Onyń 20-25%-ǵa jýyǵy ónerkásip qajetine jumsalady.
Aıta keteıik, Qazaqstanda sý únemdeý tehnologııalary 700 myń gektardan astam jerge engizildi.
