Qazaqstanda 67 iri sý kózi lastanǵan
NUR-SULTAN. QazAqparat - Qazaqstandaǵy 67 iri sý kózi aýyzsý retinde paıdalanýǵa jaramsyz. Sý resýrstaryn tıimdi basqarý máselesine arnalǵan halyqaralyq semınar barysynda osyndaı aqparat aıtyldy, dep habarlaıdy QazAqparat tilshisi.
«Eýorpalyq Odaq pen Ortalyq Azııa arasyndaǵy qorshaǵan ortany jáne sý resýrstaryn qorǵaý salasyndaǵy óńirlik yntymaqtastyq deńgeıin arttyrý» jobasynyń sarapshysy Anatolıı Krýtov Qazaqstanda jerústi sý kózderiniń lastanýy jappaı beleń alyp bara jatqanyn aıtady.
«Sońǵy ondaǵan jylda Ortalyq Azııadaǵy ózender burynǵydan beter lastana túsken. Qazaqstan týraly da osyny aıtýǵa bolady. «Qazgıdromet» mekemesiniń deregi boıynsha, aýyzsý kózi retinde sanalatyn ózen-kólderdiń ishinde tek 7 sý kózi ǵana «normaǵa saı» dep tanylǵan. 42 ózen «qalypty lastansa», 24 ózen óte qatty lastanǵan. Bir ózen shekten tys ýly sanalady», - deıdi Anatolıı Krýtov.
Degenmen, sarapshynyń aıtýynsha, mundaı jaǵdaı ekologııaǵa erekshe kóńil bólinetin Batys elderine de tán kórinedi.
«Bul ózen-kólderge adam jolamasyn degen sóz emes. Tek aýyzsý kózi retinde paıdalanýǵa bolmaıdy. Bul - tek Qazaqstanǵa ǵana tán problema emes. Álemniń barlyq elderinde bar. Qazaqstan bul turǵydan alǵanda jahandyq reıtıngtiń bel ortasynda tur. Shvetsııa, Lıýksembýrg sııaqty elderde ózen-kólderdegi sýdyń sapasy syn kótermeıdi. Sóıte tura olardy aýyzsý kózi retinde paıdalandy. Óıtkeni, tehnologııa jaqsy damyǵan. Ondaı tehnologııany sizderge engizetin bolsa, atalǵan kózderdiń barlyǵyn aýyzsý qubyryna paıdalanýǵa bolar edi», - deıdi Anatolıı Krýtov.
Anatolıı Krýtov aýyzsý máselesi Ortalyq Azııa elderinde ońdy sheshilýi úshin Eýropalyq Odaq qarjylaı kómek kórsetýge daıyn ekenin aıtady.
«Osy semınar barysynda Eýropalyq Odaq ókilderi kóptegen qyzyqty usynystar aıtty. Sonyń ishinde ınvestıtsııalyq jobalardy qarjylandyrýǵa daıyn ekenin aıtyp otyr. Sondyqtan, Qazaqstanǵa sý resýrstaryn basqarý jáne paıdalaný boıynsha qandaı máseleniń ózekti ekenin paıymdap alý qajet», - deıdi sý resýrstarynyń sarapshysy.
