Qazaqstanda 664 myńnan astam adam járdemaqy alady

ASTANA. QazAqparat - 1999-2015 jyldar aralyǵynda memlekettik áleýmettik tólemaqylarǵa baǵyttalǵan respýblıkalyq bıýdjettiń shyǵyny 6,9 esege ósti, ıaǵnı bul baǵytta 25,8-den 177,5 mlrd. teńgege deıin artty.

«Atalǵan kezeńde múgedektikke baılanysty áleýmettik tólemaqylardyń ortasha kólemi 7,3 esege ósti. Asyraýshysynan aıyrylý jaǵdaıy boıynsha áleýmettik tólemaqynyń kólemi 4,8 esege ósip, 2015 jyly 20 555 teńge boldy (1999 jyly - 4 250 teńge)»,-delingen QR Densaýlyq saqtaý jáne áleýmettik damý mınıstrligi málimetinde.

Sonymen qatar, jas ereksheligine baılanysty járdemaqy 5,7 esege ósti: 1999 jylǵy 1 951 teńgeden 2015 jyly 11 110 teńgege deıin artty.

Esterińizge sala keteıik, 2016 jylǵy 1 qańtardan bastap múgedektik, asyraýshysynan aıyrylý jaǵdaıy boıynsha jáne jasyna baılanysty memlekettik áleýmettik járdemaqylar mólsheri 7 paıyzǵa ulǵaıtyldy. Aǵymdaǵy jylǵy 1 naýryzdaǵy málimetterge sáıkes, Qazaqstanda 664 myńnan asa áleýmettik járdemaqy alýshylar tirkelgen.