Qazaqstanda 650-den astam qolónershiniń bastamasyna qoldaý kórsetilip keledi
ASTANA. KAZINFORM – Búgin elimizde alǵash ret Qolónershiler kúni atalyp ótip jatyr. Ataýly kún ulttyq qolónerdi jańǵyrtý, dástúrli kásipti dáripteý jáne mádenı murany saqtaýǵa úles qosyp júrgen sheberlerdiń eńbegine qurmet retinde resmı merekeler kúntizbesine engizilgen, dep habarlaıdy Mádenıet jáne aqparat mınıstrligi.
Elimizdegi qolónershilerdiń basyn qosqan irgeli uıymdardyń biri – 2012 jyly qurylǵan Qazaqstan qolónershiler odaǵy. Búginde uıym respýblıka boıynsha 650-den astam sheberdiń shyǵarmashylyq bastamalaryn qoldap keledi.
– Ulttyq qolónerdi saqtap, dástúr sabaqtastyǵyn jalǵastyrý maqsatynda «Kreatıvti ındýstrııalardy damytý qory» korporatıvtik qory «Ulttyq qolóner mektebi» jobasyn usyndy. Bul bastama qolóner sheberlerine qoldaý kórsetýdi, olardyń tájirıbesin jas býynǵa jetkizýdi jáne ulttyq qolónerdiń ozyq úlgilerin keńinen nasıhattaýdy kózdeıdi, – delingen habarlamada.
Joba 15 shildede bastalady.
Qazaqstan qolónershiler odaǵy qurylǵannan beri «Sheber» respýblıkalyq qolónershiler baıqaýy 12 ret ótkizilip, ondaǵan kórme, festıval, oqytý semınarlary men sheberlik sabaqtary uıymdastyryldy.
Osy bastamalar aıasynda júzdegen sheber men jas maman kıiz basý, keramıka, zergerlik óner, aǵash oıý, keste tigý jáne ulttyq qolónerdiń ózge de túrleri boıynsha bilimin jetildirdi.
Qazaqstandyq sheberler AQSh, Ulybrıtanııa, Frantsııa, Úndistan, Qytaı, Malaızııa, Túrkııa, Ózbekstan, Ázerbaıjan jáne basqa da elderde ótken halyqaralyq kórmeler men festıvalderge qatysyp, ulttyq qolónerdi álemdik deńgeıde tanytyp keledi.
Keıingi jyldary Qazaqstan qolónershiler odaǵy Brıtan keńesi, Smıtson halyq shyǵarmashylyǵy jáne mádenı mura ortalyǵy, Dúnıejúzilik qolóner keńesi jáne basqa da halyqaralyq uıymdarmen birlesken jobalardy júzege asyrdy.
Mádenıet jáne aqparat mınıstrligi ulttyq qolónerdi halyqaralyq deńgeıde dáripteýge erekshe kóńil bólip otyr. Qazaqstannyń sheteldegi mádenıet kúnderi aıasynda Tájikstan men Qatarda qolóner kórmeleri uıymdastyryldy. 2026 jyly otandyq sheberler Armenııa, Ázerbaıjan jáne Ózbekstanda ótken halyqaralyq festıvalderge qatysty.
Budan bólek, maýsym aıynda «Kreatıvti ındýstrııalardy damytý qory» janynan óńirlerdegi kreatıvti bastamalardy qoldaýǵa arnalǵan Creative Aimaq jobasy iske qosyldy. Bul jobaǵa qolóner sheberleri de qatysyp keledi.
2023 jyldan beri Qazaqstan Respýblıkasynyń Ulttyq mýzeıinde Qolónershiler ortalyǵy jumys isteıdi. Ortalyq qolóner buıymdaryn kópshilikke tanystyryp, sheberlik sabaqtaryn uıymdastyratyn mádenı alańǵa aınaldy.
Ulttyq qolónerdi álemdik deńgeıde tanytýǵa múmkindik bergen mańyzdy bastamalardyń biri – 2025 jyly ótken ALA CRAFT halyqaralyq festıvali. Sol jyly Almatyǵa mýzykalyq aspap jasaý jáne zergerlik óner baǵyttary boıynsha Dúnıejúzilik qolóner qalasy mártebesi berildi.
2026 jylǵy naýryz aıynda Almatyda «Nomadic Art: Dala mádenıetiniń jahandyq kelbeti» halyqaralyq festıvali ótti. Onyń aıasynda ǵylymı-tájirıbelik konferentsııa, sándik-qoldanbaly óner kórmeleri jáne etnostıldegi kıim toptamalarynyń kórsetilimderi uıymdastyryldy.
