Qazaqstanda 64% avtokóliktiń paıdalaný merzimi on jyldan asqan

NUR-SULTAN. QazAqparat – Elimizde tirkelgen 3,9 mln avtomobıldiń 64 paıyzynda paıdalaný merzimi 10 jyldan asqan. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtyp berdi, dep habarlaıdy QazAqparat tilshisi.

«Qazirgi ýaqytta avtokólik atmosferalyq aýany lastaýdyń negizgi kózderiniń biri bolyp otyr. Onyń sebepteriniń biri – avtokólik quraldarynyń tozýy. Tirkelgen 3,9 mln avtomobıldiń ishinde paıdalaný merzimi 10 jyldan asqan 2,5 mln kólik bar. ıAǵnı 64% quraıdy», - dedi Maǵzum Myrzaǵalıev búgingi Úkimet otyrysynda.

Mınıstrdiń aıtýynsha, ótken jyldyń sońynda «Tehnıkalyq retteý týraly» Zańy qabyldanyp, janar-jaǵarmaı quıý beketterindegi otynnyń sapasyn K4 jáne K5 ekologııalyq synyptaryna sáıkestigine baqylaý kúsheıtildi.

«Osyǵan baılanysty, Saýda jáne ıntegratsııa mınıstrligine janar-jaǵarmaı quıý beketterindegi otynnyń sapasyn baqylaýdy júzege asyrý qajet dep sanaımyz. Budan basqa, tehnıkalyq baıqaý stantsııalary men avtokólik ıeleriniń jaýapkershiligin kúsheıtý óte mańyzdy. Óz kezeginde ákimdikter avtoparkterdi jańartý jumystaryn jalǵastyrýy qajet», - dedi M. Myrzaǵalıev.

Buǵan deıin Ekologııa mınıstri óńirlerdegi ekologııalyq problemalar qalaı sheshilip jatqanyn baıandaǵan edi.