Qazaqstanda 62 memlekettiń qatysýymen halyqaralyq konferentsııa ótedi
ASTANA. KAZINFORM — Májilis «Qazaqstan Úkimeti men Birikken Ulttar Uıymy arasyndaǵy tsıfrlyq ınklıýzııa jáne transformatsııa jónindegi Azııa-Tynyq muhıt mınıstrlik konferentsııasyn uıymdastyrý týraly kelisimdi ratıfıkatsııalaý týraly sheshim qabyldady.
Zań jobasyn tanystyrǵan Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev bul konferentsııanyń Qazaqstanǵa ne beretinin aıtty.
«Ózderińizge belgili, qazirgi tańda mınıstrlik tarapynan tsıfrlandyrý salasynda kóptegen jumystar atqarylyp jatyr. Ol jumys halyqaralyq damý ınstıtýttarynyń oń baǵasyn taýyp, álemge tanymal. Kóptegen memleket bizdiń tájirıbemizdi zerttep bizdiń tsıfrlyq sheshimderimizge qyzyǵýshylyq tanytyp otyr. Osyǵan oraı, 2023 jylǵy 19 mamyrda Azııa jáne Tynyq muhıty komıssııasynyń 79-shy sessııasynda Tsıfrlyq ınklıýzııa jáne transformatsııa jónindegi mınıstrlik konferentsııasyn ótkizý jáne Tsıfrlyq ortalyqty qurý jónindegi Qazaqstannyń bastamasyn 62 memleket qoldady. 2024 jylǵy 22 sáýirde Bangkok qalasynda BUU Azııa jáne Tynyq muhıty komıssııasynyń 80-shi sessııasy sheńberinde atalǵan konferentsııany ótkizý kelisimine qol qoıyldy», — dedi ol.
Mınıstr bul konferentsııa Qazaqstannyń IT-eksportynyń ósýine jol ashady.
«Konferentsııa barysynda 62 eldiń delegattary men halyqaralyq uıymdardyń sarapshylaryna bizdiń Govtech sheshimder men startaptar kórmesi uıymdastyrylady», — dedi mınıstr.
Depýtattar atalǵan qujatty ratıfıkatsııalaý týraly sheshim qabyldady.
