Qazaqstanda 600-ge jýyq shaǵyn emxana salynady
Mınıstrdiń aıtýynsha, alǵashqy medıtsınalyq-sanıtarlyq kómek xalyqqa barynsha qoljetimdi bolýy úshin aldaǵy úsh jylda 595 ambýlatorııalyq mekemeler salynady.
«Sonyń 577-si aýyldarda, 18-i qalalarda boı kóteredi. Osylaısha, 2021 jylǵa deıin alǵashqy medıtsınalyq-sanıtarlyq kómektiń shaǵyn nysandary salynyp, qazirgi júktemeni azaıtady ári aýylda turatyn xalyqty tolyǵymen qamtýǵa múmkindik beredi. Osy mekemelerge bólinetin qarjynyń shamamen 42 protsenti memlekettik-jekeshelik áriptestik esebinen bolady», - dedi E.Birtanov Úkimettiń búgingi otyrysynda.
Onyń sózine qaraǵanda, qoǵamdyq densaýlyq saqtaý men alǵashqy medıtsınalyq-sanıtarlyq kómekti qarjylandyrý kezeń-kezeńimen 60 protsentke jetkizý josparlanǵan. Sonyń nátıjesinde atalǵan baǵyttardy qarjylandyrý kólemi 2,3 esege ósip, 2022 jylda 936 mıllıard teńgege deıin kóteriledi.
«Osynyń bári jalpy praktıka dárigeriniń rólin kúsheıtip, negizgi aýrýlarlyń gospıtalızatsııasyn 30 protsentke tómendetedi. Sonymen qatar, onkologııalyq aýrýlardy erte anyqtaýǵa múmkindik beredi», - dep atap kórsetti E.Birtanov.
Aıta keteıik, keshe «Nur Otan» partııasynyń XVIII sezinde QR Prezıdenti Nursultan Nazarbaev qoǵamdyq densaýlyq saqtaý men alǵashqy medıtsınalyq-sanıtarlyq kómekti qarjylandyrý kólemin 40 protsentten 60-qa deıin arttyrýdy tapsyrǵan bolatyn.
«Halyqtyń turǵylyqty jerine qaramastan sapaly medıtsınalyq qyzmet bolýy qajet. Al otandyq medıtsına aýrýdyń aldyn alý jáne salaýatty ómir saltyna basymdyq berýi shart. Qoǵamdyq densaýlyq saqtaý men alǵashqy medıtsınalyq-sanıtarlyq kómekti qarjylandyrý kólemin 40 protsentten 60-qa deıin arttyrý qajet. Bul - damyǵan elderdiń tájirıbesi», - dedi N.Nazarbaev.
