Qazaqstanda 60 myńǵa jýyq pedagog JI-men jumys isteýdi úırenedi
ASTANA. KAZINFORM – Bıyl Qazaqstanda shamamen 60 myń pedagog tsıfrlyq saýat pen jasandy ıntellektige qatysty baǵdarlamalar boıynsha oqýdan ótedi. Bul týraly Oqý-aǵartý mınıstrligi Kazinform agenttiginiń saýalyna bergen jaýabynda málim etti.
Vedomstvonyń habarlaýynsha, bıyl memlekettik tapsyrys aıasynda muǵalimderdiń jasandy ıntellekt salasyndaǵy quzyretin damytýǵa baǵyttalǵan 4 bilim berý baǵdarlamasy iske asyrylyp jatyr.
– Atap aıtqanda, «Bilim berýdegi jasandy ıntellekt modelderi», «Jekelegen oqytýǵa arnalǵan tsıfrlyq tehnologııalar men jasandy ıntellektini qoldaný» kýrstary, sondaı-aq bastaýysh synyp muǵalimderi men shaǵyn jınaqty mektep pedagogterine arnalǵan biliktilikti arttyrý baǵdarlamalary, – dep habarlady mınıstrlik.
Sonymen birge, tsıfrlyq saýat pen JI negizderi taqyryptary «Órleý» ortalyǵynyń barlyq bilim berý baǵdarlamalaryna engizilgen.
– Bıyl «Órleý» ortalyǵy júrgizip jatqan 38 bilim berý baǵdarlamasynyń barlyǵyna pedagogterdiń tsıfrlyq saýaty men JI negizderine qatysty taqyryptar kiriktirildi, – delingen vedomstvo aqparatynda.
Mınıstrlik málimetinshe, atalǵan baǵdarlamalar aıasynda el boıynsha shamamen 60 myń pedagogty qamtý josparlanyp otyr.
Aıta keteıik, Mańǵystaýda 300-den astam áıel-pedagog robototehnıka treneri atanady.
