Qazaqstanda 6 shildede órt qaýpi men aptap ystyq kúsheıedi

ASTANA. Kazinform – 6 shildede tsıklon jáne atmosferalyq frontaldy bólimderdiń áserinen Qazaqstan aýmaǵynyń basym bóliginde aýa raıynyń turaqsyz sıpaty saqtalady, dep habarlaıdy Qazgıdromet.

Sınoptıkterdiń boljaýynsha, naızaǵaı oınap, jańbyr jaýady, eldiń soltústigi men shyǵysynda qatty jańbyr jaýýy múmkin. Keıbir óńirlerde burshaq túsý yqtımaldyǵy bar. Respýblıka boıynsha jeldiń kúsheıýi boljanyp otyr, soltústik pen shyǵysta daýyl turýy, soltústik-batys pen soltústikte túngi jáne tańerteńgi ýaqyttarda tuman túsýi múmkin.

Tek eldiń ońtústiginde, ońtústik-shyǵysynda jáne ortalyǵynda antıtsıklon sileminiń yqpalymen jaýyn-shashynsyz aýa raıy kútiledi.

Sondaı-aq birneshe óńirde órt qaýpi joǵarylaıdy. Atap aıtqanda, Mańǵystaý oblysynda, Atyraý oblysynyń batysy men ońtústiginde, Almaty oblysynyń ońtústigi men shyǵysynda, Aqmola oblysynyń batysynda, Shyǵys Qazaqstan oblysynyń ońtústiginde, Aqtóbe oblysynyń ońtústigi men ońtústik-shyǵysynda, Ulytaý oblysynyń ortalyǵynda joǵary órt qaýpi saqtalady.

Al Jambyl, Qyzylorda, Túrkistan, Jetisý oblystarynda, Almaty oblysynyń soltústigi, batysy men ortalyǵynda, Qaraǵandy jáne Ulytaý oblystarynyń batysy, shyǵysy men ońtústiginde, Aqtóbe oblysynyń ortalyǵynda, Mańǵystaý oblysynyń soltústik-batysynda, Qostanaı oblysynyń ońtústik-batysynda jáne Abaı oblysynyń ońtústiginde tótenshe órt qaýpi boljanady.

Kúndiz keıbir óńirlerde qatty ystyq kútiledi: Almaty oblysynda - 35°S, Atyraý oblysynda - 35-36°S, Jetisý oblysynyń shyǵysy, soltústigi men ońtústiginde - 35-37°S, Túrkistan oblysynyń ońtústiginde - 40°S, Ulytaý oblysynyń ońtústiginde - 35°S, Aqtóbe oblysynyń ońtústiginde 35-36°S deıin ysıdy.