Qazaqstanda 6 saladaǵy taýarlarǵa tańbalaý tártibi engiziledi

NUR-SULTAN. QazAqparat – Saýda jáne ıntegratsııa mınıstri Baqyt Sultanov Qazaqstanda 6 sala boıynsha taýar toptaryna tańbalaý tártibi engiziletinin málim etti, dep habarlaıdy QazAqparat tilshisi.

«Halyqaralyq tájirıbe taýarlardy tańbalaý – saýda salasynyń kóleńkeli aınalymyn tómendetýge baǵyttalǵan pármendi quraldyń biri ekenin dáleldeıdi. Mysaly, Brazılııa men Túrkııada alkogoldi jáne alkogolsiz sýsyndar segmentinde salyqtardyń jınalý kórsetkishi 20% jáne 142%-ǵa ósken. Eýropalyq Odaq elderinde tsıfrlyq qadaǵalaý júıesi 5 jyl ishinde kontrabandalyq ónim aınalymyn 30%-ǵa tómendetti. Amerıka Qurama Shtattarynda dári-dármekti tańbalaý qaıtaryp alý protsesin 3 kúnnen 10 sekýndqa deıin jedeldetýge múmkindik berdi», - dedi Baqyt Sultanov Úkimet otyrysynda.

Mınıstrdiń aıtýynsha Qazaqstanda da 6 sala boıynsha tańbalaý tártibin engizý kózdelgen. Tańbalanatyn taýar toptarynda kóleńkeli naryq kólemi saraptamalarǵa sáıkes 63%-ǵa deıin jetedi.

«Osy taýar toptaryn tańbalaýdy engizý arqyly, zańdy taýar aınalymynyń kólemi 337 mıllıard teńgege, al bıýdjet kiristeri 58 mıllıard teńgege artatyny boljanyp otyr», - dedi ol.