Qazaqstanda 6 myń áskerı qyzmetshige jeńildetilgen zaım beriledi
«Osy jyly biz áskerı qyzmetshilerge arnalǵan asa mańyzdy jobany bastadyq. Ol Otan qorǵaýshylarǵa baspana alýǵa múmkindik beredi. Bul maqsatta bank 98 mlrd teńge bólip otyr. Onyń 74 mlrd teńgesi áskerı qyzmetshilerge nesıe berýge jumsalady. Qalǵan 24 mlrd teńgeni keıbir zaımdardy qaıta qarjylandyrýǵa baǵyttaımyz. Nesıe berý ashyq ári ádiletti júrý úshin arnaıy upaı júıesin engizdik. Negizgi kórsetkish - úmitkerlerdiń áskerı qyzmet atqarǵan merzimi. Bir aı ishinde - 2 shilde men 1 tamyz aralyǵynda bank áskerı qyzmetshilerden ótinish qabyldady. Bank úmitkerlerge zaımnyń úsh túrin usynady. Bir aıdyń ishinde 13 myńdaı ótinish kelip tústi. Qazir 4400 ótinish iriktep alyndy. Myńnan astamy qarastyrylyp jatyr. Ótinish sany boıynsha Astana men Almaty, Óskemen qalalary kósh bastap tur», - dedi OKQ-da ótken baspasóz máslıhatynda «Turǵyn úı qurylys jınaq banki» AQ Basqarma tóraıymy Lázzat Ibragımova.
Basqarma tóraıymy atap ótkendeı, máselen úı qunynyń 5 paıyzyna teń bastapqy jarnasy bar áskerı qyzmetshi jyldyq mólsheri 7 paıyz bolatyn nesıege úmitker bola alady. Bul jaǵdaıda klıent tańdaǵan baspana - jańa úıler naryǵynan qurylys júrgizip jatqan qurylys júrgizýshige tıesili bolýy kerek. Ekinshiden, 20 paıyz kólemindegi bastapqy jarnasy bar áskerı qyzmetshi úshin nesıeniń jyldyq mólsherlemesi 6 paıyzǵa tómendeıdi. Munda da úıdi qurylys salýshynyń ózinen satyp alý kerek.
Al qaıtalama naryqtan ózim tańdap alamyn degen áskerı qyzmetshige Turǵyn úı qurylys jınaq bankindegi depozıtke 20 paıyzǵa teń bastapqy jarna jınaý kerek. Osylaısha, ol jyldyq mólsherlemesi 8 paıyz bolatyn nesıege ótinish bere alady.
Qazirgi ýaqytta atalmysh zaımǵa úmitkerler tizimine Shekara qyzmeti, Ulttyq Ulan, Áskerı prokýratýra, Іshki ister mınıstrligi, Qorǵanys mınıstrligi men Memlekettik qorǵaý qyzmetteriniń qyzmetkerleri enedi.
