Qazaqstanda 6 mln gektardan astam egistik alqaby «tsıfrlandyryldy»
ASTANA. QazAqparat - Qazaqstandyq fermerler minagro.kz portalynyń elektrondy bazasyna 6,3 mln gektar egistik alqabyn engizdi, dep habarlaıdy QazAqparat «Aqparattyq-esepteý ortalyǵy» AQ baspasóz qyzmetine silteme jasap.
Taratylǵan aqparatqa qaraǵanda, egistik alqaptaryn «tsıfrlandyrý» memlekettik qoldaý tetikterin jeńildetip, bıýrokratııa men jemqorlyq táýekelderin aıtarlyqtaı qysqartatyn bolady.
«Qıyndyqtar týyndaǵanymen olardyń barlyǵyn da sheshýge bolady. Máselen, fermerlerdiń biri portalda tirkelgennen keıin BIN-in júkteý barysynda bazadaǵy óziniń alańshasyn tabal almaıdy. Ne bolmasa shynaıy kólemniń jer kadastrindegi kóleminen aıyrmashylyǵy bolýy múmkin. Keıbir óńirlerde ákimdikter bul máselelerdi bir kúnniń ishinde «jershiler» arqyly sheshedi, ıaǵnı aqparatty ózektendiredi. Degenmen, fermerler tarapynan jer kadastrynyń sapasyna qatysty shaǵymnyń jetkilikti ekenin moıyndaý qajet. Buǵan qosa, bul tek qana memlekettik vedomstvolardyń emes, sonymen birge fermerlerdiń de kinási. Kópshiligi tipti ESQ-da almaǵan. Al ol HQKO-ǵa júginip, 20-30 mınýttyń ishinde sheshetin másele. Alaıda, biz bir-birimizdi kinálap, kemshilikter izdeý úshin jumys istemeımiz. Biz aýyl sharýashylyǵymyzdy barynsha tıimdi, agroónerkásip keshenine memlekettik qoldaý júıesin barynsha ashyq, ınvestorlar úshin tartymdy jasaý úshin jumys isteımiz», - dedi atalǵan ortalyqtyń bas mamany Azamat Qurmanov.
Sonymen qatar taratylǵan málimette, Batys Qazaqstan oblysynyń egistik alqabynyń 50 paıyzy tsıfrlandyrylǵandyǵy aıtylǵan. Odan keıingi orynda Qostanaı oblysy tur. Bul óńirdiń fermerleri 1962196 gektar alqapty bazaǵa engizgen. Al Soltústik Qazaqstan oblysy fermerleriniń bazaǵa engizgen egistik alqaby munan 40 myń gektarǵa kem. Degenmen bazadaǵy tsıfr mınýt saıyn ózgerip otyratyndyǵyn da eskergen jón.
