Qazaqstanda 6 iri un tartý kásiporynda undy dárýmendermen baıytý qolǵa alynǵan - ıÝNISEF-tiń ana men bala taǵamyn jaqsartý jónindegi baǵdarlamasynyń úılestirýshisi
Bul týraly ıÝNISEF-tiń ana men bala taǵamyn jaqsartý jónindegi baǵdarlamasynyń úılestirýshisi Aıgúl Nurǵabylova dárýmendermen, mıneraldarmen baıytylǵan undy tutyný arqyly anemııa aýrýynyń aldyn alý jáne atalǵan ónimge tutynýshy suranysyn arttyrý maqsatynda ótkizilgen jýrnalıster arasyndaǵy respýblıkalyq baıqaýdyń qorytyndysyna arnalǵan baspasóz máslıhatynda aıtty.
Taıaýda ońtústik óńirlerdiń un tartý kásiporyndarynda bolyp qaıtqandyǵyn aıtqan onyń sózine qaraǵanda, kásiporyndardyń kópshiligi undy qajetti dárýmendermen baıytýǵa qajetti premıks ónimi qymbat dep esepteıdi eken.
«Un tartatyn kásiporyndar jylyna shamamen premıks satyp alýǵa 60-70 myń dollar shyǵyndaıdy. Bul oraıda, Qazaqstan Astyq óńdeýshileri men naýbaıshylar odaǵynyń prezıdenti Evgenıı Gan sońǵy 6 jylda memleket un tartý salasyna nesıeleý mólsherlemesin tómendetý arqyly 3,767 mıllıon teńge kóleminde qoldaý kórsetti degen sózi oralady. Sonymen qatar memleket unǵa salynatyn qosymsha qun salyǵyn qaıtaryp otyr. Sondyqtan olar úshin atalǵan soma sonshalyqty kóp qarjy emes», deıdi A.Nurǵabylova.
Premıks Stepnogor qalasynda ornalasqan Bıomedpreparat kombınatynda shyǵarylady. 2009 jyldyń ishinde atalǵan kombınat 20 tonna premıks óndirgenin aıta kelip, ol «bul dárýmendi syrttan tasymaldaýdyń esh qajeti joq. Máselen Eýropa elderinde onyń tonnasy 7-8 eýro tursa, elimizdegi quny 8-9 dollardy quraıdy. Al 1 tonna premıks shamamen 8 myń tonnaǵa jýyq undy baıytýǵa jetedi», dedi óz sózinde.
Taǵam quramynda temir men folıts qyshqyly sııaqty dárýmender men mıneraldardyń jetispeýshiligi qazirgi ýaqytta jer betine keń taraǵan ári qaýipti qorek tapshylyǵyna aınalyp otyr. Bul jetispeýshiliktiń adamnyń tirshilik etýine, damýyna, densaýlyǵy men aqyl-oı múmkindikterine jáne eńbek ónimdiligine keri áser etetindigi dáleldengen. Al undy dárýmendermen baıytý úderisi barysynda joǵary jáne birinshi suryptaǵy undy tehnologııalyq turǵydan qaıta óńdeý kezinde joǵaltqan dárýmender men mıneraldarǵa qaıta ıe bolmaq.
