Qazaqstanda 6 doktoranttyń dıssertatsııasynan plagıat anyqtaldy

ASTANA. QazAqparat – Ǵylym jáne joǵary bilim mınıstrligi Ulttyq ǵylym akademııasy quramyndaǵy saladan tys mamandardan arylý jumystary qalaı júrip jatqanyn aıtty, dep habarlaıdy QazAqparat tilshisi.

Prezıdent Qasym-Jomart Toqaev Almaty qalasynyń jurtshylyǵymen kezdesýde: «Ǵylym akademııasy ǵylymǵa múldem qatysy joq adamdardan arylýy kerek», - dep málimdegen edi.

Osyǵan baılanysty bizdiń redaktsııa mınıstrlikke «Eńbekteri plagıat, esh ǵylymı jańalyǵy joq dıssertatsııa jazǵan «doktorlar» áshkerelendi me?», dep saýal joldady.

Buǵan vedomstvodan bylaı jaýap berdi: «Jumys qorǵaýǵa qabyldanǵannan keıin 10 jumys kúni ishinde dıssertatsııalyq keńes doktoranttyń otandyq jáne halyqaralyq derekter bazalary boıynsha plagıatty paıdalanýyn tekserý úshin dıssertatsııany «Ulttyq memlekettik ǵylymı-tehnıkalyq saraptama ortalyǵy» aktsıonerlik qoǵamyna jiberedi.

Al ortalyq dıssertatsııa túsken kúnnen bastap 10 jumys kúni ishinde onyń mátinin ashyq qoljetimdi túrde óziniń ınternet-resýrsynda ornalastyrady. Kez kelgen ǵalym tanysyp, oǵan óziniń pikirin bildirýge quqyly. Sondaı-aq ashyq túrde qorǵaýdan ótip, komıtettiń qaraýyna kelip túsken dıssertatsııalyq jumysty saraptaý keńesiniń músheleri tekseredi. Saraptaý keńesiniń tekserýi nátıjesinde sońǵy 2 jylda 6 dıssertatsııalyq jumystan plagıat anyqtalyp, doktoranttar qaıta qorǵaý quqyǵynan aıyryldy».

Qosa ketsek, qazir ǵylymı dárejesi men ataǵy bar pedagogter jáne ǵylymı qyzmetkerlerge memlekettik bıýdjet esebinen tólenetin qosymsha aqy somasyn ulǵaıtý boıynsha jumys júrip jatyr.