Qazaqstanda 6 aıda 69 875 jańa avtomobıl satyldy
ALMATY. 24 shilde. QazAqparat - Qazaqstannyń avtomobıl naryǵyndaǵy 2010 jyly bastalǵan damý úderisi bıyl da óz jalǵasyn tabýda.
Bul týraly Qazaqstandyq avtobıznes qaýymdastyǵynyń alǵashqy jartyjyldyqqa sholýynda málim bolyp otyr.
«Ǵalamdyq naryqta sońǵy jartyjyldyqta sarapshylar buǵan deıin baıqalmaǵan bir úrdisti ańǵarǵan. Satyp alýshylar kóbinese óz elinde qurastyrylǵan jáne ulttyq markidegi avtomobılderdi tańdaýda. Bul Eýropa odaǵy men TMD elderine de qatysty bolyp otyr. Búkil álemdegi avtomobıl naryǵynda «Otandyq ónimdi satyp al!» urany jeńiske jetýde», - deıdi qaýymdastyq prezıdenti Andreı Lavrentev. Onyń aıtýynsha, otandyq brendter Frantsııada alǵashqy ondyqta, al Italııada - Fiat, Ýkraınada - ZAZ, Reseıde Lada kósh bastaýda. Qazaqstannyń avtonaryǵynda da ósim baıqalýda. Máselen, resmı dıllerler arqyly usynylǵan jańa avtomobılder saýdasy maýsymda 14,5 myń danany qurap, byltyrǵy jyldyń sáıkes kezeńimen (8445 dana) salystyrǵanda 71 paıyzdyq ósim tirkeldi. Al jartyjyldyqtaǵy ósim 72 paıyzdy qurady. Atap aıtqanda bıyl 6 aıda 69 875 jańa avtomobıl satylsa, ótken jyly dál osy ýaqytta bul kórsetkish 39 980 bolǵan edi. Sondaı-aq bıyl ımporttyq kólikter - 79, Qazaqstanda qurastyrylǵandar 21 paıyzdy qurap otyr. Al naryqtaǵy sheteldik óndirýshiler arasynda Reseıdiń úlesi - 51,8, Japonııa - 9, Ózbekstan - 8,6,, BAÁ - 3,2, Koreıa - 3,1, Germanııa 0,9 paıyz bolyp otyr.
