Qazaqstanda 6 aıda 400 tonna tamaq ónimderi jeýge jaramsyz dep tanylǵan
ASTANA. 24 shilde. QazAqparat - Memlekettik sanıtarlyq-epıdemıologııalyq baqylaý komıtetiniń 2013 jylǵy І jartyjyldyqtaǵy tekserisinen keıin 400 tonna shamasyndaǵy tamaq ónimi jeýge jaramsyz dep tanylyp, kózi joıylǵan. Bul týraly búgin Densaýlyq saqtaý mınıstrliginde ótken baspasóz máslıhaty barysynda Memlekettik sanıtarlyq-epıdemıologııalyq baqylaý komıtetiniń tóraǵasy Jandarbek Bekshın málimdedi.
Komıtet tóraǵasynyń aıtýynsha, jyl basynan beri saýda nysandaryn josparly tekserý barysynda 400 tonna tamaq ónimderi jaramsyz dep tanylsa, sonyń ishinde saqtaý merzimi ótip ketken azyq 80 tonnadan asyp jyǵylǵan. «7 tonna ónimniń qaýipsizdigi rastalatyn tıisti qujattary joq bolyp shyqty. Sonymen qatar mıkrobıologııalyq kórsetkishtermen sáıkes kelmeıtin 300 tonna ónim anyqtalǵan. «Barlyq jaramsyz ónimder satýdan alynyp, kózi joıyldy», - deıdi J. Bekshın.
Onyń aıtýynsha, mamyrdyń basynan 18 shildege deıin zerthanalarda kókónis pen jemis-jıdek ónimderiniń 10 myń synamasyna zertteý júrgizilgen. Solardyń 178-inde nıtrat (tuz jáne azot qyshqylynyń efıri) deńgeıiniń tıisti mólsherden asyp ketý jaǵdaıy tirkelgen. Al qazirgi tańda áli de bolsa qarbyz ben qaýyndardaǵy nıtrat quramynyń deńgeıi tıisti mólsherden 1,5 esege asyp otyrǵany baıqalady.
