Qazaqstanda 6 aıda 21,1 mlrd. tekshe metr gaz óndirildi

ASTANA. QazAqparat - Qazaqstanda aǵymdaǵy jyldyń 6 aıynda 21,1 mlrd. tekshe metr gaz óndirildi, bul byltyrǵy jyldyń osy kezeńimen salystyrǵanda 102 paıyzdy qurap otyr. Bul týraly QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Munaı jáne gaz mınıstri Uzaqbaı Qarabalın málimdedi.

Vedomstvo basshysynyń sózine qaraǵanda, esepti kezeńde taýarly qurǵaq gaz óndirý 14 mlrd. tekshe metrdi qurasa, suıytylǵan gaz 1 mlrd. 186 mln. tonnany qurady.

«Tabıǵı gazǵa ishki suranys aıtarlyqtaı artty. Jarty jyl ishinde bul 6,9 mlrd. tekshe metrdi qurady, bul ótken jylǵy kezeńge 120 paıyzǵa deıin barady. Osynyń ózi óńirlerdi gazdandyrý jónindegi baǵdarlamanyń tabysty júzege asyp jatqanyn bildiredi. Gazdandyrýdyń bas josparyna sáıkes, bul jumys áli de jalǵasady», - dedi mınıstr.

Toqtala ketetin jaıt, «QazTransGaz» kompanııasy men «Azııagazqubyry» jelisi boıynsha alty aıda elimizdiń aýmaǵy arqyly 46 mlrd. tekshe metrge jýyq gaz tasymaldanǵan.