Qazaqstanda 5G jelisin taratý aýqymy qandaı

ASTANA. KAZINFORM — Eki jylda 4G jelisi barlyq eldi mekenderdiń 92 paıyzyna deıin jetedi. Bul týraly Úkimet otyrysynda Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev málimdedi. 

— Qazir elimizdegi aýyldardyń 84 paıyzynda mobıldi ınternet bar. 2027 jyldyń sońyna deıin baılanys operatorlary bul kórsetkishti odan ári arttyrý úshin birqatar aýqymdy jobany júzege asyrady. Nátıjesinde, 4G jelisi barlyq eldi mekenniń 92 paıyzyna deıin jetedi. Sonymen qatar, 5G jelisi oblystyq jáne respýblıkalyq mańyzy bar 20 qalaǵa engizilip, qalalardyń 60-75% aýmaǵyn qamtıtyn bolady. Budan bólek, 40 000 shaqyrym avtojol boıy 4G mobıldi ınternetimen qamtamasyz etiledi. Bul joba jeke ınvestordy tarta otyryp júzege asyrylady, — dedi Jaslan Mádıev.

Onyń aıtýynsha, alys jáne az qonystanǵan aýyldardy ınternetpen qamtý máselesi spýtnıktik baılanys jobalary arqyly sheshilip jatyr. 2025 jyldyń sońyna deıin basqa tehnologııalar jete almaǵan 504 aýyl spýtnıktik ınternetke qosylady.

— Qazir el naryǵynda 3 spýtnıktik ınternet operatory jumys isteıdi. 2027 jylǵa deıin naryqqa taǵy 2 kompanııa keledi dep kútilip otyr, olardyń pılottyq synaqtary 2026 jyly ótedi. Sonymen qatar 2025-2026 jyldary el aýmaǵynda Direct to cell (D2C) qyzmetin iske qosý josparlanyp otyr. Bul joba el aýmaǵyn uıaly baılanyspen tolyqtaı qamtıdy. Birinshi kezeńde, 2026 jyly, SMS-habarlamalar qoljetimdi bolady. Odan keıin, 2027 jyly, daýys baılanysy men derekterdi berý qyzmetterin kórsetý josparlanǵan. Júrgizilip jatqan jumystardyń nátıjesinde Qazaqstan spýtnıktik baılanys boıynsha tsıfrlyq habqa aınalyp keledi, — dedi mınıstr.

Budan buryn habarlanǵandaı, «Astana — Arqalyq» baǵytynda júretin poıyzda Starlink spýtnıktik ınterneti qosyldy.