Qazaqstanda 583 490 stýdent JI boıynsha sertıfıkat aldy

ASTANA. KAZINFORM – Qazaqstanda AI-Sana baǵdarlamasy arqyly 583 490 stýdent, magıstrant jáne doktorant jasandy ıntellekt boıynsha sertıfıkat aldy. 

Bul týraly QR Ǵylym jáne joǵary bilim mınıstrligi Kazinform agenttiginiń resmı saýalyna joldaǵan jaýabynda málimdedi.

Mınıstrliktiń málimetinshe, AI-Sana baǵdarlamasynyń birinshi kezeńi qorytyndylanyp, sertıfıkat alǵan bilim alýshylardyń jalpy sany tirkelgen.

– Búgingi kúni AI-Sana baǵdarlamasynyń birinshi kezeńin iske asyrý sheńberinde 583 490 stýdent, magıstrant jáne doktorant sertıfıkat aldy. Baǵdarlama sheńberinde oqytý nátıjelerin baǵalaý mindetti qorytyndy testileýdi jáne teorııalyq materıaldy, sondaı-aq bazalyq qoldanbaly daǵdylardy meńgerýdi tekserýge baǵyttalǵan praktıkalyq tapsyrmalardy oryndaýdy qamtıdy jáne sertıfıkat berýmen aıaqtalady, - delingen mınıstrliktiń resmı jaýabynda.

Jaýaptylar AI-Sana baǵdarlamasynyń birinshi kezeńi aıasyndaǵy oqytý birneshe bilim berý platformasynda júrgizilgenin jetkizdi. Oqý protsesi barysynda jasandy ıntellekt boıynsha kýrstar halyqaralyq jáne ulttyq seriktester bazasynda iske asyrylǵan.

– Astana Hub-pen birlesip 2025 jyldyń naýryz aıynan bastap 194 441 stýdent sertıfıkattaldy. Coursera kompanııasymen yntymaqtastyq aıasynda 95 joǵary oqý ornyna 36 890 lıtsenzııa berilip, olardyń nátıjesinde jasandy ıntellekt boıynsha 86 775 sertıfıkat alyndy. Baǵdarlamany iske asyrý barysynda Huawei kompanııasy Huawei ICT Academy aıasynda jasandy ıntellekt boıynsha bilim berý kýrstaryn engizdi, oqytý 48 akademııa bazasynda júrgizilip, nátıjesinde stýdentter 243 755 sertıfıkat aldy, - deıdi mamandar.

Aıta keteıik, bıyldan bastap Atyraý oblysyndaǵy bilim berý uıymdarynda ornatylǵan beınebaqylaý júıesine jasandy ıntellekt múmkindikteri engiziledi.