Qazaqstanda 580 myń gektardan astam alqapta sý únemdeý tehnologııasy qoldanylady
ASTANA. KAZINFORM – Qazaqstanda sý únemdeý tehnologııalary engizilgen egis alqabynyń kólemi 580 myń gektardan asty.
Memleket basshysynyń jyl saıyn 150 myń gektar jerge sý únemdeý tehnologııalaryn engizý jónindegi tapsyrmasyn oryndaý aıasynda Sý resýrstary jáne ırrıgatsııa mınıstrligi sharýalardy zamanaýı sýarý júıelerine kóshýge yntalandyrý tetikterin ázirledi.
Mınıstrlik fermerlerge sý únemdeý tehnologııalaryn satyp alý men ornatýǵa, sondaı-aq ınfraqurylym tartý kezinde uńǵyma burǵylaýǵa jumsalǵan shyǵyndardyń ótemaqysyn 50%-dan 80%-ǵa deıin ulǵaıtty. Sonymen qatar tarıf qunyna qaraı sýarý sýyna saralanǵan sýbsıdııalar engizildi. Sý únemdeý tehnologııalaryn qoldanǵan jaǵdaıda sýbsıdııa kólemi 60%-dan 85%-ǵa deıin ósedi, al qoldanbaǵan jaǵdaıda – tarıfke baılanysty 50–75%-dan 30–55%-ǵa deıin tómendeıdi.
Sondaı-aq lazerlik tegisteýshi satyp alýǵa beriletin sýbsıdııa egis alqaby keminde 200 gektar bolatyn sharýashylyqtarǵa ǵana tólenedi degen talap alynyp tastaldy. Lazerlik tegisteý sýdy 30%-ǵa deıin únemdeýge múmkindik beredi jáne qýańshylyqqa beıim óńirler úshin ózekti. Bul tehnologııa elimizdegi kúrish alqaptarynda belsendi qoldanylady.
2024 jyly sý únemdeý tehnologııalary 158 myń gektar jerge engizildi, onyń shamamen 130 myń gektary – ońtústik óńirler úlesinde. Jalpy sý únemdeý tehnologııalary qoldanylǵan jer kólemi 470,2 myń gektarǵa jetken. Bıyldyń basynan beri bul kórsetkish 580 myń gektardan asty.
«Memleket basshysy sý únemdeý tehnologııalaryna kóshýdiń mańyzdylyǵyn birneshe ret atap ótti. Klımattyń ózgerýi jaǵdaıynda bul – eldiń sý qaýipsizdigin qamtamasyz etý úshin qajet shara. Oblys ákimdikterimen birlesip, 2030 jylǵa deıin egis alqaptarynda sý únemdeý júıelerin engizý josparyn ázirlep, bekittik. Nátıjesinde 2030 jyldyń sońyna deıin jylyna 2,2 mlrd tekshe metr sý únemdeýdi kózdep otyrmyz», – dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, Almatyda jalpy sý paıdalaný qaǵıdalary ózgerdi.