Qazaqstanda 57 mlrd. teńgege 22 sý qoımasy salynady

ASTANA. QazAqparat - Qazaqstanda 57 mlrd. teńgege 22 sý qoımasy salynady. Bul týraly búgin Ortalyq kommýnıkatsııalar qyzmetindegi brıfıngte QR Aýyl sharýashylyǵy mınıstrligi Sý resýrstary komıtetiniń tóraǵasy Islam Ábishev málim etti, dep habarlaıdy QazAqparat.

Bizdiń «Qazsýsharýashylyǵy» mekemesiniń balansynda 78 sý qoımasy bolsa, sonyń 52-si strategııalyq óte mańyzdy nysan sanalady. Aldaǵy ýaqytta sýarmaly jerlerdi sýmen qamtý durys jolǵa qoıylýy úshin 22 sý qoımasyn salmaqpyz. Bizdiń esepteýimizshe onyń jobalyq quny 57 mlrd. teńgeni quraıdy. Jalpy, biz osy 22 sý qoımasyn salýdyń arqasynda 1,9 mlrd. tekshe metrge sý qoryn ulǵaıtpaqpyz», - dedi komıtet basshysy

Sonymen qatar ol qazirgi ýaqytta qoldanystaǵy 42 sý qoımasy kúrdeli jóndeýden ótetindigin basa aıtty.

«Onyń da jumystary bıyl bastalyp ketti. Jalpy, bul eki pozıtsııany respýblıkalyq bıýdjetten qarjylandyramyz. Sebebi, muny tarıf arqyly qaıtarý múmkin emes», - dedi Ábishev.  

Aıta keteıik, QR-dyń agroónerkásiptik keshenin damytýdyń 2017-2021 jyldarǵa arnalǵan memlekettik baǵdarlamasy boıynsha 610 myń ga aýmaqtaǵy turaqty sýarylatyn jerdiń ırrıgatsııalyq júıesin qalpyna keltirý josparlanǵan. Onyń ishinde Almaty oblysynda - 127  myń ga, OQO  - 99 myń ga, ShQO - 92 myń ga, Jambyl oblysy - 86 myń ga, BQO - 40 myń ga, Pavlodar oblysy - 30 myń ga, Aqtóbe oblysy  29 myń ga, Qyzylorda oblysy  - 29 myń ga, Qaraǵandy oblysy - 28 myń ga, SQO - 28 myń ga, Atyraý oblysy - 22 myń ga sýarmaly jer qalpyna keltiriledi. Munan bólek, memlekettik baǵdarlama aıasynda 368 myń ga aýmaqtaǵy lımandy sýarý jerin qalpyna keltirý kózdelgen. Onyń ishinde BQO-da - 163 myń ga, ShQO-da - 56 myń ga, Aqmola oblysynda - 44 myń ga, Aqtóbe oblysy - 41 myń ga, Atyraý oblysy - 36 myń ga, Pavlodar oblysy - 24 myń ga, Qaraǵandy oblysy - 4 myń ga jer bar.