Qazaqstanda 560 amerıkalyq kompanııa jumys isteıdi
«AQSh – Qazaqstan ekonomıkasynyń ekinshi iri ınvestory ekenin atap ótkim keledi. Qazaqstanda amerıkalyq kapıtaldyń qatysýymen 560-tan astam kompanııa tabysty jumys istep jatyr. Saýda-ekonomıkalyq jáne ǵylymı-tehnıkalyq kooperatsııany odan ári nyǵaıtý joldary da búgingi otyrysta talqylanýda. Pikir almasý jolymen biz elimizdegi saıası reformalardy, demokratııalandyrý men adam quqyqtaryn saqtaýdy qarastyrdyq jáne aldaǵy ýaqytta da qarastyratyn bolamyz», - dedi Aqan Rahmetýllın Qazaqstan men AQSh arasyndaǵy Keńeıtilgen strategııalyq áriptestik jónindegi komıssııa otyrysynan keıingi brıfıngte.
Onyń aıtýynsha, qazaqstandyq tarap amerıkalyq áriptestermen birge S-5+1 dıalogy Ortalyq Azııadaǵy yntymaqtastyqty nyǵaıtýdyń mańyzdy quraly bolyp qala beredi degen pikirde.
«Kelesi jyly biz ózara saıası jáne ekonomıkalyq baılanystardyń osyndaı joǵary qarqynyn joǵary deńgeıde ustap turýǵa nıettimiz. Amerıkalyq seriktesterimizge elimizge saparlaǵany úshin, sharalarǵa belsendi qatysqany úshin alǵys aıtamyz», - dedi A.Rahmetýllın.
Aıta keteıik, búgin QR Syrtqy ister mınıstriniń orynbasary Aqan Rahmetýllın men AQSh Memlekettik hatshysynyń kómekshisi Donald Lýdyń tóraǵalyǵymen Qazaqstan men AQSh arasyndaǵy Keńeıtilgen strategııalyq áriptestik jónindegi komıssııa otyrysy ótti.
Buǵan deıin Donald Lý Qazaqstanǵa Pfizer vaktsınasyn jetkizý máseleleri jóninde pikir bildirgen edi.
