Qazaqstanda 56 stomatologııalyq klınıka lıtsenzııasyn erikti túrde qaıtardy
ASTANA. KAZINFORM — Densaýlyq saqtaý mınıstrligi el aýmaǵy boıynsha stomatologııalyq klınıkalarǵa jospardan tys tekserýler júrgizip jatyr. Jalpy 400-ge jýyq klınıka tekserildi.
Bul jumys memlekettik organdardyń tapsyrmalary sheńberinde Medıtsınalyq jáne farmatsevtıkalyq baqylaý komıtetiniń aýmaqtyq departamentteri arqyly júzege asyrylýda.
— Jalpy tekserý tizimine 622 stomatologııalyq klınıka engizilgen, búgingi tańda 392 tekserý júrgizildi. Medıtsınalyq jáne farmatsevtıkalyq baqylaý komıtetiniń málimetinshe, 103 klınıkada zańbuzýshylyqtar anyqtalmaǵan. Qyzmetin toqtatqan 174 stomatologııalyq klınıkanyń 56-sy medıtsınalyq qyzmetti júzege asyrý lıtsenzııasyn erikti túrde qaıtarǵan, — delingen habarlamada.
Jekelegen jaǵdaılarda jedel áreket etý sharalary qabyldanyp, sýbektiniń qyzmeti 30-dan 90 kúnge deıin ýaqytsha toqtatyldy, sondaı-aq medıtsınalyq qyzmetkerler 30 kúnge deıin jumystan shettetildi.
Tekserý barysynda medıtsınalyq kómekti kórsetý standarttarynyń saqtalýyna, lıtsenzııalyq talaptardyń oryndalýyna jáne bilikti mamandardyń bolýyna erekshe nazar aýdarylyp otyr.
Júrgizilip jatqan tekserýler, eń aldymen, patsıentterdiń quqyqtaryn qorǵaýǵa, olardyń qaýipsizdigin qamtamasyz etýge jáne stomatologııalyq qyzmetterdiń sapasyn arttyrýǵa baǵyttalǵan.
Osydan buryn Semeıde tekserilmegen ólshem quraldaryn qoldanǵan stomatologııaǵa aıyppul salynǵany belgili boldy.
