Qazaqstanda 56 kólikti shetelge zańsyz shyǵarǵan top áshkerelendi
ASTANA. KAZINFORM – Іshki ister mınıstrligi avtokólikterge qatysty alaıaqtyq jasady degen kúdikke ilingen qylmystyq toptyń áreketine tosqaýyl qoıdy, dep habarlaıdy Polisia.kz.
Aldyn ala málimet boıynsha, kúdiktiler jalǵan tulǵalardyń atyna nesıege rásimdelgen 56 avtokólikti shetelge shyǵaryp, qaıta satqan.
Polisia.kz málimetinshe, kúdiktiler ekinshi deńgeıli bankter men mıkroqarjy uıymdary arqyly avtokólikterdi jalǵan tulǵalardyń atyna kepilge rásimdegen. Keıin kólikterdi Qazaqstan aýmaǵynan tys jerlerge shyǵaryp, satqan.
Qylmystyq árekettiń jolyn kesý úshin ІІM elimizdiń 10 óńirinde bir mezgilde jedel is-sharalar júrgizdi. Nátıjesinde 48 adam polıtsııaǵa jetkizildi. Olardyń altaýy qylmystyq topty uıymdastyrdy degen kúdikpen ýaqytsha ustaý ızolıatoryna qamaldy.
Jedel is-sharalar qylmystyq toptyń odan ári áreket etýine tosqaýyl qoıyp, alaıaqtyqtyń jańa derekteriniń aldyn alýǵa múmkindik berdi.
-Qazir oqıǵanyń barlyq mán-jaıy anyqtalyp jatyr. Sondaı-aq shetelge shyǵarylǵan avtokólikterdi izdestirý sharalary júrgizilýde. Tergeý barysy ІІM-niń baqylaýynda,-delingen habarlamada.
Іshki ister mınıstrligi azamattardy «Zań men tártip» qaǵıdatyn ustanyp, qyraǵy bolýǵa jáne alaıaqtardyń arbaýyna túspeýge shaqyrdy.
Osyǵan deıin habarlaǵanymyzdaı, jyl basynan beri uıymdasqan qylmystyq top múshelerine qatysty 45 qylmystyq is sotqa joldandy. Birqatar is boıynsha aıyptylar 17 jylǵa deıin bas bostandyǵynan aıyryldy.
