Qazaqstanda 530 myńnan astam oqýshy qosymsha bilim alady
ASTANA. 9 qarasha. QazAqparat - Qazaqstanda qosymsha bilim júıesimen qamtylǵan balalardyń sany 530 myńnan asady,
dep habarlady QR Premer-Mınıstriniń resmı saıty QR Bilim jáne ǵylym mınıstrliginiń baspasóz qyzmetine silteme jasap.
«Qazaqstanda qosymsha bilim júıesimen qamtylǵan 6-18 jastyń aralyǵyndaǵy balalardyń sany- 537 072, bul jalpy oqýshylar sanynyń 21,8 paıyzyn quraıdy», - delingen vedomstvo habarlamasynda.
Habarlamada atap kórsetilgendeı, jyl saıyn 600-den astam oqýshy qosymsha bilim boıynsha túrli halyqaralyq jáne respýblıkalyq konkýrstardyń jeńimpazdary jáne júldegerleri atanyp jatady.
Qosymsha bilim júıesinde 13 784 pedagog jumys isteıdi jáne olardyń 30,9 paıyzy - biliktilikti jetildirý kýrstarynan ótken. Aǵymdaǵy jyly 300 pedagog biliktilikterin arttyrady.
Balalardy qosymsha bilimmen barynsha qamtýdyń aıasynda Oqýshylardyń fýnkıonaldyq saýattylyǵyn damytý jónindegi 2012-2016 jyldarǵa arnalǵan ulttyq josparda balalarǵa qosymsha bilim berý júıesin jańǵyrtý jáne ınnovatsııalyq oqytý tehnologııalaryn engizý sharalary qarastyrylyp otyr.
Oǵan qosa, Ulttyq jospardyń aıasynda qosymsha bilim berý júıesiniń 418 uıymynyń materıaldyq-tehnıkalyq bazasyn nyǵaıtýǵa 8,9 mlrd. teńge qarjy bólinedi.
Aıta ketý kerek, tárbıe jumystaryn jetildirý úshin Tıptik keshendi jospar bekitilip otyr. Bul jospar boıynsha tárbıeleý baǵdarlamalary men bilim berýdiń barlyq deńgeıi boıynsha kórsetiletin qyzmetterdiń tıimdiligine monıtorıng júrgizý, tárbıe jumystaryn uıymdastyrý máseleleri boıynsha ádistemetik quraldar, oqý ádebıetterin basyp shyǵarý qarastyrylǵan.
Esterińizge sala keteıik, Qazaqstan Respýblıkasynda bilim berýdi damytýdyń 2011 - 2020 jyldarǵa arnalǵan memlekettik baǵdarlamasynda qosymsha bilimniń mazmunyn jetildirý, qosymsha bilim beretin uıymdardyń jelisin damytý jáne balalardyń qamtylý kórsetkishin 30 - 50 paıyzǵa jetkizý sharalary qarastyrylǵan.
