Qazaqstanda 505 eldi mekendi sý basý qaýpi týyndady
ASTANA. QazAqparat - QR ІІM Tótenshe jaǵdaılar komıtetiniń tóraǵasy Vladımır Bekker kóktemgi sý basý qaýpi bar 505 eldi mekenniń anyqtalǵanyn málim etti, dep habarlaıdy QazAqparat tilshisi.
«Qazirgi tańda kóktemgi sý basý qaýpi bar 505 eldi meken anyqtalyp otyr. Olardyń 75-i Almaty oblysynda, 76-y Shyǵys Qazaqstanda, 46 eldi meken Aqmola oblysynda, 35-i Aqtóbe óńirinde, 33-i Qaraǵandy aımaǵynda, 31-i Qyzylorda oblysynda, 52-i Qostanaı oblysynda, 14-i Pavlodar óńirinde jáne 18-i Soltústik Qazaqstan oblysynda», - dedi Vladımır Bekker TJK-da ótken baspasóz máslıhatynda.
Komıtet tóraǵasynyń aıtýyna qaraǵanda, sý tasqyny men erigen sýlardyń áserin tómendetý maqsatynda turǵyndar men kólik ınfraqurylymyna 2017 jyldan bastap tasqyndy boldyrmaý boıynsha jol kartasy iske asyrylýda.
«Jol kartasy boıynsha 2 jyldyń ishinde 357 is-shara ótkizildi. 174 qorǵaý bógeti salynyp, nyǵaıtyldy. 119 gıdrotehnıkalyq qurylys júrgizilip, 64 kópir jóndeldi», - dedi ol.
Vladımır Bekker atap ótkendeı, TJK sý tasqyny jaǵdaıynyń yqtımal kúsheıýine jedel den qoıý maqsatynda azamattyq qorǵaý organdarynyń kúshteri men quraldarynyń arnaıy toptaryn jasaqtaǵan. Qutqarý jumystary sekildi kezek kúttirmeıtin jumystardy júrgizý úshin barlyq bólimsheler (onyń ishinde azamattyq qorǵanys boıynsha áskerı bólimder) qajetti tehnıkamen, jabdyqtarmen qamtamasyz etilgen.
«Osy jyldyń 26-27 aqpanynda Petropavlda ótetin «Kóktem-2019» respýblıkalyq komandalyq shtabtyq oqý-jattyǵý barysynda azamattyq qorǵaý organdarynyń, kúshter men quraldarynyń is-qımyldary praktıkalyq turǵyda pysyqtalatyn bolady», - dep túıdi Vladımır Bekker.
