Qazaqstanda 504 eldi meken spýtnıktik ınternetke qosyldy
ASTANA. KAZINFORM - «Qoljetimdi ınternet» ulttyq jobasy aıasynda Qazaqstanda spýtnıktik tehnologııalardy paıdalaný arqyly 504 aýyldyq eldi meken ınternet jelisine qosyldy.
Jobany Qazaqstan Respýblıkasynyń Jasandy ıntellekt jáne tsıfrlyq damý mınıstrligi júzege asyrǵan.
Ulttyq jobanyń basty maqsattarynyń biri - talshyqty-optıkalyq baılanys jelilerin tartý nemese uıaly baılanys bazalyq stantsııalaryn ornatý ekonomıkalyq ári tehnıkalyq turǵydan múmkin emes, shalǵaı jáne halqy az eldi mekenderdi ınternetpen qamtamasyz etý. Mundaı aýyldarda turaqty ári joǵary jyldamdyqtaǵy ınternetke qol jetkizý úshin spýtnıktik baılanys júıeleri qoldanyldy.
2023 jyldan bastap KazSat spýtnıkteri arqyly 176 aýyldyq eldi meken ınternetke qosyldy.
Qalǵan 328 aýyldyq eldi meken beıgeostatsıonarlyq spýtnıktik júıeler (NGSO) negizinde OneWeb tehnologııasy arqyly, Jusan Mobile operatorynyń qatysýymen ınternetke qosyldy.
Nátıjesinde, «Qoljetimdi ınternet» ulttyq jobasynda kózdelgen barlyq 504 aýyldyq eldi meken spýtnıktik ınternetpen tolyq qamtyldy.
Jobanyń iske asyrylýy aýyl turǵyndaryna onlaın bilim alý, elektrondyq memlekettik qyzmetterdi paıdalaný, telemedıtsınaǵa qol jetkizý jáne jaqyndarymen turaqty baılanys ornatý sııaqty zamanaýı tsıfrlyq múmkindikterdi ashty. Bul eldi mekenderdegi ómir sapasyn arttyrýǵa jáne qala men aýyl arasyndaǵy tsıfrlyq alshaqtyqty azaıtýǵa múmkindik beredi.
Aıta keteıik, osyǵan deıin Aqtóbe oblysyndaǵy 17 aýyl áli ınternet jelisine qosylmaǵany týraly jazdyq.